Tragjedi në Liqenin e Ohrit: Përmbyset kanoeja, humb jetën 57-vjeçari

Një ngjarje e rëndë ka tronditur Ohrin, ku një person ka ndërruar jetë pasi kanoeja me të cilën po lundronte është përmbysur në ujërat e liqenit, rreth 200 metra larg bregut. Sipas informacioneve zyrtare të siguruara nga SPB Ohër, rasti është denoncuar në Stacionin Policor ditën e djeshme, më 10 tetor, rreth orës 18:30. Si pasojë e këtij aksidenti tragjik në ujë, jetën ka humbur 57-vjeçari me inicialet A.N. Menjëherë pas marrjes së njoftimit, strukturat policore dhe një ekip i Ndihmës së Shpejtë janë nisur drejt vendit të ngjarjes. Pavarësisht ndërhyrjes së shpejtë, ekipi mjekësor ka mundur vetëm të konstatojë vdekjen e viktimës. Në lidhje me këtë ngjarje, Prokurori Publik ka lëshuar urdhër për dërgimin e trupit të pajetë në Institutin e Mjekësisë Ligjore për obduksion, për të zbardhur rrethanat e plota të fatkeqësisë.