Gjenerallejtënant Arben Kingji pritje lamtumirëse për komandantin e KFOR-it, Ozkan Ulutash

Shefi i Shtabit të Përgjithshëm të Forcave të Armatosura të Shqipërisë, gjenerallejtënant Arben Kingji, ka zhvilluar një takim zyrtar me komandantin e KFOR-it, gjeneralmajor Ozkan Ulutash, me rastin e mbylljes së misionit të tij në krye të trupave paqeruajtëse të NATO-s në Kosovë. Nëpërmjet një njoftimi publik, Kingji ka përcjellë falënderimet dhe vlerësimet e tij më të larta për udhëheqjen dhe përkushtimin që Ulutash ka treguar gjatë periudhës së tij në shërbim të KFOR-it. Gjatë bisedës, dy ushtarakët e lartë kanë shkëmbyer mendime rreth përpjekjeve të vazhdueshme të KFOR-it për të garantuar një mjedis të sigurt në Kosovë dhe për të ruajtur paqen e stabilitetin në të gjithë rajonin. Në këtë kuadër, gjenerali Kingji ka rikonfirmuar vullnetin e palëkundur të Shqipërisë dhe të Ushtrisë shqiptare për të vazhduar përmbushjen me përgjegjësi të misioneve dhe detyrimeve në kuadër të këtij operacioni kyç të Aleancës Veriatlantike.