Mikel Arteta vulos të ardhmen: Trajneri spanjoll firmos kontratë afatgjatë me Arsenalin

Klubi londinez i Arsenalit ka zyrtarizuar vazhdimësinë në stol, pasi trajneri Mikel Arteta ka vënë firmën e tij në marrëveshjen e re që e mban të lidhur me 'Topçinjtë' deri në muajin qershor të vitit 2030. Prej emërimit të tij në krye të skuadrës në dhjetor të vitit 2019, strategu spanjoll ka njohur rritje të vazhdueshme. Sezonin e kaluar, ai udhëhoqi klubin drejt triumfit historik në kampionat, duke i siguruar Arsenalit titullin e 14-të në histori dhe të katërtin nën ombrellën e Premier League. Ky sukses shënoi rikthimin e lavdisë për skuadrën nga Londra, e cila nuk e fitonte kampionatin anglez për plot 22 vjet. Pas finalizimit të marrëveshjes së re, vetë tekniku u shpreh tejet i lumtur për këtë kapitull të vazhdueshëm në karrierën e tij: “Është privilegj të angazhohem për të ardhmen time me klubin dhe të vazhdoj të punoj me njerëz të jashtëzakonshëm që duan më të mirën për Arsenalin. Ky klub është unik, për karakterin dhe mënyrën se si të bën të ndihesh. Jam jashtëzakonisht i privilegjuar që rrugëtimi ynë së bashku do të vazhdojë”. Më tej, ai shtoi se ambiciet e skuadrës janë në nivele shumë të larta: “Ne kemi ndërtuar tashmë një lidhje të veçantë dhe kemi krijuar kujtime që do të mbeten përgjithmonë. Ajo që është emocionuese është se ky është vetëm fillimi i asaj që mund të arrijmë së bashku”. Statistikat flasin qartë për punën e bërë nga Arteta, i cili deri më tani ka udhëhequr Arsenalin në 361 ndeshje zyrtare në të gjitha garat. Ai mban një përqindje mbresëlënëse prej 62.05% fitoresh, shifra kjo që përbën rekordin më të lartë për çdo trajner me kohë të plotë në historinë e lavdishme të klubit. Krahas numrit një të stolit, edhe i gjithëstafi i tij teknik ka vendosur të zgjasë bashkëpunimin, duke përshtatur kontratat e tyre me kohëzgjatjen e marrëveshjes së re të trajnerit Arteta.