Alarmi në elitën angleze: Manchester City rrezikon deri në 200 pikë zbritje dhe pasoja fatale

Krerët e Premier League-s ndodhen nën trysni të madhe, të frikësuar se një vendim i butë ndaj Manchester Cityt mund të minojë integritetin e kampionatit dhe marrëveshjet televizive multimiliardëshe që mbajnë gjallë futbollin anglez. Sipas burimeve mediatike pranë ngjarjes, drejtuesit e lartë të futbollit në Britani vlerësojnë se kjo çështje mbart peshë kritike për të ardhmen e të gjithë kompeticionit, ku vetëm kontrata aktuale televizive përfaqëson një vlerë prej pesë miliardë stërlinash. Kryeqendra e shqetësimit mbetet akuza se klubi nga Manchesteri ka manipuluar dhe fryrë në mënyrë artificiale pasqyrat financiare për gati një dekadë, duke përdorur marrëveshje që konsiderohen si të dyshimta. Në aspektin ligjor, llogaritë e bëra nga ekspertët e fushës tregojnë një skenar katastrofik për “Qytetarët”. Duke u bazuar në precedentët ndëshkues të aplikuar më parë për Evertonin dhe Nottingham Forestin, City mund të ndëshkohet me një zbritje prej 160 deri në 200 pikë. Ekspertët sugjerojnë se një penalitet kaq drastik do të duhet të ndahet përgjatë disa sezoneve, pasi rregulloret nuk lejojnë fshirjen e një numri kaq të madh pikësh brenda vetëm një viti garues. Megjithatë, klubet anëtare të Premier League-s dhe ato të Championship-it nuk kanë një qëndrim unik, gjë që e bën pothuajse të pamundur ngritjen e një padie të përbashkët kolektive kundër Manchester Cityt. Disa skuadra insistojnë në masa ndëshkimore shembullore, kurse të tjera druhen se dëbimi ose dënimi i rëndë i Cityt do të dëmtonte markën e Premier League-s, të ardhurat dhe dominimin e saj evropian, duke rrezikuar madje rikthimin e projektit të Superligës. Në frontin e brendshëm, futbollistët e klubit kanë nisur konsultimet me përfaqësuesit e tyre ligjorë për të kërkuar dëmshpërblim për bonuset e humbura nga pozicionet e parealizuara në tabelë gjatë sezoneve të kaluara. Situata komplikohet edhe nga faktori gjeopolitik; autoritetet e Abu Damit kanë lënë të kuptohet se mund të shkurtojnë investimet e tyre në Mbretërinë e Bashkuar nëse klubi goditet rëndë, ndërkohë që qeveria britanike po e monitoron zhvillimin e çështjes me vëmendje maksimale. Një vendim i ashpër mund të shkaktojë një efekt domino: shpërbërjen e organikës së lojtarëve, ngërçe në shlyerjen e detyrimeve për transferimet, dëme ekonomike për skuadrat e tjera, gjoba marramendëse dhe ndryshime rrënjësore në strukturën e pronësisë. Beteja ligore mund të zgjatet pafundësisht nëse Manchester City vendos ta çojë çështjen në Gjykatën Supreme britanike. Në një skenar të tillë, procesi do të kalonte në duart e gjyqtarëve jo-sportivë, duke i dhënë një rrjedhë krejtësisht tjetër ngjarjeve. Kujtojmë se Manchester City ka zyrtarizuar ankesën e tij më 2 tetor. Tani procedura kërkon një afat prej 12 javësh për shqyrtimin e pretendimeve, ndërsa komisioni i pavarur do të ketë edhe 30 ditë shtesë në dispozicion për të shpallur vendimin përfundimtar.