Kritika e ashpër e ish-deputes së LDK-së: Zoti e ndihmoftë partisë time, kërkohet reflektim i menjëhershëm

Adelina Thaçi Meta, ish-deputete e Lidhjes Demokratike të Kosovës (LDK), ka drejtuar kritika të forta ndaj qasjes aktuale që kjo forcë politike po mban përballë zhvillimeve më të fundit në skenën politike të vendit. Përmes një postimi në rrjetet sociale, ajo ka vënë në dukje se në Kuvend po regjistrohen ngjarje të pazakonta, duke aluduar se kursi aktual rrezikon ta drejtojë LDK-në drejt një rrugëtimi që nuk përkon me pritshmëritë e elektoratit të saj. “Nëse nuk kthjelleni, nëse nuk tregoni se dini të merrni vendime, të jeni konsistentë në atë që mendoni se është e drejtë, të këmbëngulni kur duhet dhe të lini anash inatet personale e pazaret e vogla; nëse nuk i afroni njerëzit dhe nuk e kuptoni se askush nuk fiton duke i larguar njerëzit e vet, atëherë do të shkoni aty ku nuk dëshiron askush që ju ka besuar”, ka theksuar ajo në reagimin e saj. Më tej, ish-ligjvënësja i ka përcjellë urimet e saj për suksese presidentes së re, Justina Shiroka Pula, duke shprehur mbështetjen për angazhimin e saj institucional. Në mbyllje të shkrimit, ajo ka lëshuar një apel të prerë për ndryshim kursi brenda strukturave të partisë. “Ky popull është lodhur. Jemi lodhur të gjithë. Tani na duhet qetësi, përgjegjësi dhe punë. Partia ime, Zoti të ndihmoftë. Por mbi të gjitha, kthjellohu”, ka përmbyllur mesazhin e saj ish-deputetja e LDK-së.