Trazirat në Tiranë: Policia ndërhyn me ujë me presion pas hedhjes së molotovëve dhe gurëve

Situata në bulevardin kryesor të kryeqytetit ka hyrë në një fazë të re të menaxhimit nga strukturat e sigurisë, pas përshkallëzimit të dhunës nga ana e protestuesve, të cilët kanë sulmuar me mjete të forta, lëndë piroteknike dhe kokteje molotovi drejt efektivëve të policisë dhe ndërtesave shtetërore. Bazuar në zhvillimet në terren, pas breshërive të fishekzjarrëve, gurëve dhe molotovëve në drejtim të forcave të rendit dhe objekteve institucionale, Policia e Shtetit është detyruar të përdorë mjetet e posaçme me ujë në presion për shpërndarjen e turmës. Ky veprim vendimtar i forcave të rendit ka sjellë largimin e menjëhershëm të qytetarëve nga vatra e tensionit, duke bërë që hapësira para Kryeministrisë deri te ura e Lanës të boshatiset plotësisht. Menjëherë pas largimit të protestuesve, strukturat e zbatimit të ligjit kanë ndërmarrë veprimet e nevojshme për sigurimin dhe konsolidimin e perimetrit të sigurisë në zonë. Uniformat blu kanë shtuar ndjeshëm praninë e tyre në bulevard, si në numrin e efektivëve ashtu edhe në automjetet me ujë me presion, me qëllim që të shmangin çdo mundësi rigrupimi dhe të sigurojnë qetësinë publike përgjatë gjithë aksit kryesor. Vlen të theksohet se kjo shënon ditën e 26-të të protestave në Tiranë. Gjatë ditës janë mbajtur dy tubime të ndara, ku njëri është organizuar nga studentët dhe tjetri nga Partia Demokratike. Mbështetësit e PD-së e nisën tubimin e tyre para Kryeministrisë dhe më pas u drejtuan në formë marshimi drejt Ministrisë së Arsimit për t'u bashkuar me studentët, mirëpo këta të fundit kanë kundërshtuar praninë e tyre dhe kanë kërkuar largimin e strukturave të partisë, duke insistuar se protesta e tyre mbetet krejtësisht e pavarur.