Tragjedi në Poloni: Gjashtë të vdekur dhe dhjetëra të plagosur nga sulmi me armë në zemër të Krakovit

Një ngjarje e rëndë ka tronditur qendrën e Krakovit në Poloni, ku të paktën gjashtë persona kanë humbur jetën dhe 15 të tjerë kanë pësuar plagë nga një sulm me armë zjarri. Sipas informacioneve zyrtare, agresori ka hyrë me automjet në sheshin qendror të qytetit dhe ka nisur të qëllojë në drejtim të qytetarëve dhe kalimtarëve të rastit. Forcat e rendit kanë ndërhyrë menjëherë, duke neutralizuar, plagosur dhe arrestuar autorin, ndërkohë që gjatë shkëmbimit dhe aksionit kanë mbetur të plagosur edhe dy efektivë policie. Autoritetet policore kanë konfirmuar se sulmuesi është shtetas polak, duke hedhur poshtë kategorikisht çdo spekulim apo thashethem për vdekjen e ndonjë police apo për kërkimin e një bashkëpunëtori të dytë. Burime mediatike nga Polonia bëjnë me dije se i dyshuari është 25 vjeç, i veshur me uniformë ushtarake kamuflazhi dhe i pajisur me një pushkë gjysmëautomatike AR-15. Ai aktualisht ndodhet në gjendje kritike për jetën dhe po i nënshtrohet ndërhyrjes kirurgjikale në spital. Zëdhënësja e policisë rajonale, Katarzyna Cislo, ka bërë të ditur se në momentin e sulmit autori nuk posedonte asnjë dokument identifikimi, ndërsa identiteti i tij është zbuluar përmes verifikimeve intensive operative. "Autori i incidentit në sheshin kryesor në Krakov është shtetas i Republikës së Polonisë. Ne mohojmë informacionin se një oficer policie është vrarë dhe se një autor i dytë është në kërkim. I vetmi autor i njohur është nën mbikëqyrjen e policisë", ka theksuar policia përmes një njoftimi zyrtar në platformën X. Reagime të shumta kanë ardhur nga krerët më të lartë të shtetit. Presidenti polak, Karol Nawrocki, ka përcjellë mesazhet e ngushëllimit për familjarët e viktimave dhe mbështetjen e tij të plotë për të lënduarit, ndërsa kryeministri Donald Tusk ka deklaruar se strukturat e sigurisë po hetojnë thellësisht motivet dhe rrethanat e ngjarjes. Nga ana e tij, ministri i Mbrojtjes i Polonisë, Wladyslaw Kosiniak-Kamysz, ka premtuar një hetim të detajuar mbi çdo aspekt të sulmit, kurse ministri i Drejtësisë, Waldemar Zurek, u ka bërë thirrje qytetarëve për qetësi, duke siguruar se prokuroria dhe policia janë terren duke mbledhur të gjitha provat e nevojshme.