Revolucion në Onkologji: QKUK nis aplikimin e metodës së avancuar SBRT për pacientët me kancer

Klinika e Onkologjisë pranë Qendrës Klinike Universitare të Kosovës (QKUK) ka hedhur një hap të rëndësishëm drejt modernizimit të shërbimeve mjekësore, duke nisur zyrtarisht zbatin e teknikës së avancuar të radioterapisë SBRT. Ky shërbim i ri po realizohet përmes përdorimit të akseleratorit linear të sofistikuar “Elekta Versa HD”. Lajmi është bërë i ditur nga ministri i Shëndetësisë, Arben Vitia, i cili e ka cilësuar këtë zhvillim si një arritje madhore në luftën kundër sëmundjeve malinje. Sipas tij, metoda e re SBRT garanton një saktësi shumë më të lartë në shënjestrimin e tumoreve, duke siguruar njëkohësisht një mbrojtje superiore për indet e shëndosha që e rrethojnë atë, si dhe duke shkurtuar ndjeshëm numrin e seancave të nevojshme për pacientët që plotësojnë kriteret për këtë lloj trajtimi. Në një reagim publik, ministri Vitia ka theksuar se ky hap dëshmon përkushtimin institucional për ngritjen e cilësisë në sektorin publik shëndetësor. “Ky është edhe një hap konkret drejt avancimit të shërbimeve onkologjike në sistemin tonë publik shëndetësor,” ka shkruar ndër të tjera ai. Duke e përkuar këtë nisje me Ditën Ndërkombëtare të Fizikës Mjekësore, ministri Vitia ka shfrytëzuar rastin për të shprehur mirënjohjen e tij për fizikanët mjekësorë, onkologët radioterapeutë dhe teknikët e radioterapisë, duke vlerësuar lart angazhimin dhe profesionalizmin e tyre në shërbim të pacientëve. Ai ka siguruar se investimet në teknologji moderne dhe kujdes shëndetësor cilësor do të vazhdojnë edhe në të ardhmen.