Valë e re sulmesh ruse: Infrastruktura energjetike e Ukrainës pëson dëme të rënda, lënë qytetarët pa ujë dhe dritë

Infrastruktura jetësore energjetike e Ukrainës është goditur rëndë si pasojë e sulmeve të njëpasnjëshme me dronë dhe raketa balistike gjatë orëve të natës. Presidenti Volodymyr Zelensky ka bërë të ditur se ky agresion ka lënë zona të tëra pa energji elektrike dhe pa furnizim të rregullt me ujë. Sipas kreut të shtetit ukrainas, gjithsej 12 rajone të vendit janë vënë në shënjestër të forcave ruse, ndërsa situata më kritike dhe me dëmet më të mëdha është regjistruar në kryeqytetin e vendit, Kiev. Burime ndërkombëtare bëjnë me dije se nga kjo valë e dhunshme, që përfshiu lëshimin e mbi 30 raketave balistike dhe më shumë se 170 dronëve, kanë mbetur të plagosur nëntë persona në shkallë vendi, mes të cilëve edhe një fëmijë. Këto sulme të fundit ndodhin në një kohë kyçe, vetëm pak ditë para se delegacionet nga Ukraina dhe Rusia të takohen për të marrë pjesë në një raund bisedimesh trepalëshe që do të zhvillohen në Abu Dabi gjatë javës së ardhshme.