Osmani kërkon mbështetjen e senatorëve amerikanë për anëtarësimin në NATO dhe mbrojtjen e së vërtetës historike

Ish-presidentja e Kosovës, Vjosa Osmani, ka zhvilluar një takim me senatorët amerikanë, Jeanne Shaheen dhe Dick Durbin, gjatë qëndrimit të tyre për vizitë në Kosovë. Në këtë takim, Osmani ka vlerësuar lart rolin e senatores Shaheen, duke e cilësuar atë si një mbështetëse të palëkundur të shtetit të Kosovës. Në fokus të bisedimeve ishte forcimi i bashkëpunimit dypalësh. Osmani ka kërkuar mbështetjen e ligjvënësve amerikanë për integrimin e Kosovës në strukturat e NATO-s, si dhe për përshpejtimin e dialogut strategjik me Shtetet e Bashkuara të Amerikës, një proces ky i nisur zyrtarisht gjatë mandatit të saj presidencial. Ajo shprehu mirënjohjen për iniciativat e ndërmarra nga senatorët në Senatin amerikan, të cilat kontribuojnë drejtpërdrejt në stabilitetin dhe sigurinë e rajonit. Një pjesë e rëndësishme e diskutimit iu kushtua luftës kundër narrativave të rreme të Serbisë. Osmani theksoi nevojën për mbrojtjen e së vërtetës mbi luftën çlirimtare, duke paralajmëruar kundër përpjekjeve për të barazuar viktimën me agresorin. Sipas saj, drejtësia nuk mund të ndërtohet mbi shtrembërimet historike dhe propaganda serbe duhet të ndalet me fakte të pakontestueshme. Po ashtu, ish-presidentja Osmani hodhi poshtë pretendimet e propagandës serbe për gjoja represion ndaj të krishterëve në Kosovë. Ajo nënvizoi se këto pretendime janë narrative të rrezikshme që synojnë njollosjen e vlerave të Kosovës, siç janë liria fetare dhe bashkëjetesa ndëretnike. Osmani bëri thirrje që institucionet e vendit të vazhdojnë të përballen me argumente të forta juridike e politike kundër këtyre dezinformatave.