Pak muaj në krye të skuadrës italiane, shkarkohet nga detyra ish-mesfushori i Kombëtares shqiptare

Ka zgjatur më pak se ç'parashikohej aventura e Ledjan Memushajt në stolat e futbollit profesionist italian, pasi tekniku ka mbyllur para kohe bashkëpunimin me skuadrën e Altamurës, që garon në Serinë C. Ish-mesfushori i njohur i Kombëtares kuqezi është shkarkuar zyrtarisht ditën e sotme nga drejtimi i klubit, një projekt ky i nisur gjatë merkatos së verës me synime madhështore për të pretenduar ngjitjen në një kategori më të lartë. Megjithatë, ecuria në fushën e lojës nuk ka përmbushur pritshmëritë e klubit dhe tifozëve, çka ka sjellë edhe këtë vendim drastik nga ana e drejtuesve. Kthesa negative dhe humbja e pësuar në fundjavë përballë Katanias janë bërë përcaktuese për fatin e Memushajt, i cili largohet pas vetëm 9 takimeve zyrtare në krye të skuadrës, periudhë gjatë së cilës regjistroi 2 fitore, 2 barazime dhe 5 humbje. Kujtojmë se gjatë edicionit të kaluar, ish-futbollisti u dallua për aftësitë e tij dhe u cilësua si një nga trajnerët më premtues të brezit të ri, pas eksperiencës pozitive në krye të skuadrës së Leon në Serinë D.