Tragjedi në Pejë: Fëmija ndërron jetë pas aksidentit shtëpiak në Pavlan

Një ngjarje e rëndë ka tronditur fshatin Pavlan të komunës së Pejës, ku një fëmijë ka humbur jetën si pasojë e lëndimeve të rënda të marra brenda hapësirave të shtëpisë. Tragjedia ka ndodhur pasi një orendi është rrëzuar aksidentalisht mbi të miturën. Lajmin për këtë rast të dhimbshëm e ka konfirmuar zëdhënësi i Policisë së Kosovës për rajonin e Pejës, Sheremet Elezaj. Sipas informacioneve zyrtare, fëmija fillimisht kishte marrë ndihmën e parë mjekësore në Spitalin e Përgjithshëm të Pejës, ndërsa për shkak të gjendjes së rëndë shëndetësore, ajo ishte transferuar më pas për trajtim të specializuar në Qendrën Klinike Universitare të Kosovës (QKUK). Në njoftimin e autoriteteve policore thuhet: ‘’Me datë 11.10.2026, jemi njoftuar se një fëmijë i gjinisë femërore ishte dërguar në Spitalin e Përgjithshëm në Pejë dhe më pas në QKUK, si pasojë e lëndimeve që dyshohet se i ka marrë aksidentalisht nga rrëzimi i një orendie në shtëpinë e saj në fshatin Pavlan. Sot kemi pranuar konfirmimin se viktima ka ndërruar jetë’’. Pas procedurave të nevojshme ligjore, Prokurori i Shtetit ka marrë vendim që trupi i pajetë i të miturës t'u dorëzohet familjarëve për ceremoninë e varrimit.