Teherani zyrtar: Përgjigjja e Uashingtonit për Ngushticën e Hormuzit mbetet e mangët

Sekretari i Këshillit të Sigurisë së Iranit, Mohsen Rezaei, ka bërë të ditur këtë të diele se kundërpërgjigja e Shteteve të Bashkuara ndaj kushteve të parashtruara nga Teherani për zhbllokimin e Ngushticës së Hormuzit nuk i plotëson pritshmëritë. Gjatë punimeve të Asamblesë së Përgjithshme të OKB-së, pala iraniane kishte dorëzuar një plan sipas të cilit ky aks detar strategjik mund të rihapej brenda një jave, nëse plotësoheshin kërkesat e caktuara. Ky propozim u pëcoll më pas te SHBA-ja përmes kanaleve ndërmjetësuese të Katarit. Duke folur për pozicionin e vendit të tij, Rezaei theksoi se Uashingtoni duhet të japë sqarime shtesë për pikat që ende konsiderohen të paqarta. Ai përsëriti se amerikanëve iu dorëzuan shtatë kushte të prera, duke paralajmëruar se Ngushtica e Hormuzit nuk do të hapet dhe nuk do të ketë bisedime derisa këto kërkesa të përmbushen plotësisht. Sipas zyrtarit të lartë iranian, Teherani tashmë ka përfunduar ciklin e dërgimit të kundërpërgjigjeve ndaj palës amerikane. Në dokumentin e tyre, ata kanë reflektuar pozitivisht mbi disa nga kërkesat tona, ndërkohë që çështjet e tjera vijojnë të mbeten të pazgjidhura dhe ambigue, shtoi më tej ai. Në fund të muajit shtator, autoritetet iraniane konfirmuan se kishin pranuar reagimin e Uashingtonit lidhur me nismën për rivendosjen e armëpushimit në Gjirin Persik. Kjo erdhi vetëm pak kohë pasi Presidenti i SHBA-së, Donald Trump, kishte deklaruar se e kishte refuzuar atë propozim. Përpjekjet diplomatike të ndërmjetësuara nga Katari dhe palë të tjera kanë shërbyer si urë komunikimi mes dy vendeve, në tentativë për të ndalur konfliktin dhe për të rikthyer lundrimin normal në Ngushticën e Hormuzit – një kanal kyç që përpara nisjes së luftimeve në fund të muajit shkurt, pas sulmeve të SHBA-së dhe Izraelit ndaj Iranit, siguronte kalimin e një të pestës së furnizimeve botërore me naftë dhe gaz natyror të lëngshëm.