Festivali “Oda Dibrane” mbledh shqiptarët bashkë, Presidenti Begaj: Kufijtë nuk e ndajnë dot kulturën tonë

Presidenti i Republikës, Bajram Begaj, ka zhvilluar një vizitë zyrtare në Dibër, ku u bë pjesë e natës finale të edicionit të 32-të të festivalit mbarëkombëtar “Oda Dibrane”. Gjatë fjalës së mbajtur përpara qindra pjesëmarrësve, kreu i shtetit vuri në dukje kontributin e çmuar që ky aktivitet ka dhënë ndër vite në mbrojtjen e identitetit tonë kombëtar dhe në forcimin e urave lidhëse mes bashkatdhetarëve brenda dhe jashtë trojeve amë. Kreu i shtetit u prit fillimisht në një takim nga kryetari i Bashkisë së Dibrës, Rahim Spahiu. Gjatë këtij bashkëbisedimi, dy zyrtarët trajtuan çështje që lidhen me sfidat e zhvillimit rajonal, nismat e përbashkëta për gjallërimin e ekonomisë lokale, si dhe mundësitë e shumta për promovimin e vlerave turistike e kulturore të kësaj zone të pasur me tradita. Duke e vlerësuar ngjarjen në ceremoninë përmbyllëse, Presidenti e quajti “Odën Dibrane” si një emblemë të unitetit mbarëshqiptar, duke shtuar se trashëgimia shpirtërore nuk njeh ndarje administrative apo kufij shtetërorë. “Sonte jemi së bashku këtu, në Peshkopi. Dy qytete, dy shtete, një Dibër. Një kulturë që nuk e ndajnë dot kufijtë. Kjo është një nga arritjet më domethënëse të ‘Odës Dibrane’. Ajo bashkon shqiptarët e Shqipërisë me shqiptarët në Kosovë, Maqedoninë e Veriut, Malin e Zi, Luginën e Preshevës, arbëreshët dhe diasporën tonë kudo në botë”, u shpreh Begaj. Duke evokuar rëndësinë e odës tradicionale në trojet shqiptare, kreu i shtetit e përshkroi atë si hapësirën e shenjtë ku ndër breza është kultivuar mençuria e popullit, zakonet e mira, vallet, këngët, si dhe kodet e larta të besës e të mikpritjes. Për këtë arsye, ai e pagëzoi “Odën Dibrane” si një vatër të madhe të mbarë kombit shqiptar. Në fjalën e tij, Begaj bëri thirrje për një angazhim të palëkundur në mbrojtjen e trashëgimisë kulturore, duke theksuar se ajo nuk mund të trajtohet thjesht si një dukuri sezonale që kujtohet vetëm në ditë festash. “Trashëgimia kulturore nuk është vetëm kujtim i së shkuarës dhe folklori nuk mund të jetë një muze që hapet disa herë në vit, vetëm për festa. Një traditë jeton vetëm kur këndohet, kërcehet, rrëfehet, mësohet dhe përcillet. Një këngë që nuk këndohet më, humbet. Një valle që nuk mësohet më, humbet. Një fjalë, një rit, një instrument apo një mjeshtëri që nuk i kalon brezit tjetër, rrezikon të mbetet vetëm në arkivë”, deklaroi Presidenti. Në këtë kontekst, ai vlerësoi gjithashtu rolin e pazëvendësueshëm të diasporës në mbajtjen gjallë të lidhjeve me vatrat e të parëve, duke e konsideruar gjuhën, meloditë dhe zakonet si forcën më të madhe bashkuese të shqiptarëve kudo në rruzull. Në fund të fjalës së tij, Presidenti shprehu mirënjohjen e thellë për të gjithë kontributorët, nisur nga organizatorët, artistët, studiuesit e deri te institucionet dhe publiku i gjerë që e kanë mbajtur gjallë këtë festival gjatë tri dekadave e gjysmë, duke uruar që ky rrugëtim të vazhdojë me sukses. “Uroj që ‘Oda Dibrane’ të vazhdojë gjatë, të jetë oda e Dibrës dhe një odë e madhe e kulturës shqiptare, një vend ku dera mbetet e hapur dhe tradita pjesë e së ardhmes”, përfundoi Begaj.