Përplasje mes dy automjeteve në Novosellë të Pejës, katër persona pësojnë lëndime

Katër qytetarë kanë marrë lëndime trupore gjatë ditës së sotme, si pasojë e një aksidenti trafiku që ka ndodhur rreth orës 11:30, në rrugën “Mulla Zekë Bërdynaj” të fshatit Novosellë në Pejë. Lajmi është konfirmuar nga zëdhënësi i Policisë për rajonin e Gjakovës, Sheremet Elezaj, i cili bëri të ditur se në këtë ngjarje rrugore janë përfshirë dy automjete. Të lënduarit janë transportuar menjëherë në institucionin shëndetësor për ndihmën e nevojshme mjekësore. Sipas stafit mjekësor, gjendja e tyre paraqitet e qëndrueshme dhe aktualisht janë jashtë çdo rreziku për jetën. Ndërkohë, autoritetet kompetente, respektivisht Njësia Rajonale e Komunikacionit Rrugor, kanë dalë në vendin e ngjarjes dhe po merren me zbardhjen e plotë të rrethanave që çuan deri te ky aksident.