Investim i bujshëm në Emirate: Ylli i Manchester Cityt, Erling Haaland, blen rezidencë luksoze në Abu Dhabi

Sulmuesi norvegjez i Manchester Cityt, Erling Haaland, ka bërë një blerje të bujshme duke siguruar një pronë luksoze në Abu Dhabi, kryeqytetin e Emirateve të Bashkuara Arabe. Ky investim vjen në kuadër të një nisme të përbashkët rezidenciale mes klubit të Manchester Cityt dhe kompanisë së njohur të ndërtimit të pronave ekskluzive, Ohana Residences. Një detaj interesant i këtij transaksioni është se edhe babai i tij, ish-futbollisti i mirënjohur Alfie Haaland, ka siguruar një pronë në të njëjtin kompleks, ndërkohë që punimet për përfundimin e të gjithë projektit pritet të mbyllen plotësisht deri në vitin 2029. Futbollisti e bëri publike këtë lëvizje gjatë ceremonisë zyrtare të prezantimit të projektit në Etihad Arena të Abu Dhabit, ku u drejtua te të pranishmit përmes një videomesazhi të transmetuar posaçërisht për këtë ngjarje. “Përshëndetje të gjithëve! Jam shumë i lumtur që po bëhem pjesë e projektit Manchester City Ohana. Do të jemi fqinj në Abu Dhabi. Sapo bleva një shtëpi, ndërsa të njëjtën gjë e bëri edhe babai im”, u shpreh sulmuesi norvegjez në fjalën e tij. Sipas raportimeve të medias britanike “The Sun”, rezidenca e ri e yllit norvegjez shtrihet brenda një kompleksi ekskluziv në ishullin Yas të Abu Dhabit. Megjithatë, detajet e sakta rreth vendndodhjes së saktë të pronës dhe vlerës monetare të shpenzuar mbeten ende të panjohura për publikun. Ky sipërmarrje ndërtimore përfshin një gamë të gjerë pronash, duke nisur nga shtëpitë në varg, vilat moderne, e deri te rezidencat e personalizuara plotësisht sipas preferencave dhe kërkesave specifike të blerësve. Sa i përket aspektit financiar, tarifat për njësitë mëmodeste banimi me dy dhoma gjumi nisin nga mbi 800 mijë euro, ndërsa pronat më ekskluzive dhe të personalizuara sipas shijes së pronarëve fillojnë nga shifra mbi tetë milionë euro.