Siljanovska-Davkova për 11 Tetorin: Liria kërkon guxim, ndërsa shteti kërkon përkushtim dhe ligjshmëri

Me rastin e shënimit të 11 Tetorit, Ditës së Kryengritjes Popullore, presidentja e Maqedonisë së Veriut, Gordana Siljanovska-Davkova, ka përcjellë një mesazh urimi ku ka vënë inë pah peshën historike të kësaj date dhe detyrimin kolektiv për zhvillimin e një shoqërie demokratike, evropiane dhe të bazuar në sundimin e ligjit. Në fjalën e saj, ajo ka evokuar kujtimin e kryengritjes së 11 tetorit të vitit 1941 kundër forcave pushtuese fashiste, duke e cilësuar atë si një gurthemel në historinë e përpjekjeve për liri dhe shtetësi. Sipas saj, kjo datë nuk përbën thjesht një kujtesë kalendarike, por një amanet të përjetshëm për mbrojtjen dhe përparimin e vendit. Kreu i shtetit ka pohuar se heroizmi i kryengritësve dhe partizanëve na lë trashëgim një detyrim moral: që të ardhmen ta ndërtojmë përmes punës së palodhur, ndershmërisë, llogaridhënies dhe vlerave të mirëfillta të drejtësisë. Duke analizuar sfidat e kohës, Siljanovska-Davkova ka bërë thirrje për bashkim, pjekuri politike dhe qasje racionale, duke shtuar se diversiteti nuk duhet të prodhojë përçarje, por duhet shërbyer si urë komunikimi dhe bashkëpunimi. Ajo ka insistuar në domosdoshmërinë e ngritjes së një shteti ligjor ku ligji zbatohet njësoj për secilin, institucionet funksionojnë në shërbim të qytetarëve dhe dinjiteti njerëzor mbrohet si vlerë e pacenueshme. "Ish-luftëtarët dhe partizanët meritojnë mirënjohjen tonë të thellë, sepse me sakrificën e tyre na dhanë shtetin", ka përfunduar ajo, duke e përmbyllur mesazhin me urimin për 11 Tetorin dhe thirrjen për një të ardhme më të mirë evropiane.