“Po i ikën halleve të kryeqytetit” – Asamblistja e VV-së ashpër ndaj kryetarit Përparim Rama

Asamblistja e Lëvizjes Vetëvendosje në Kuvendin Komunal të Prishtinës, Nexhmije Gjema, ka drejtuar kritika të ashpra në drejtim të kryetarit të Prishtinës, Përparim Rama, duke e akuzuar atë se po merret me tema të mëdha politike e shtetërore, ndërkohë që sipas saj po neglizhon sfidat reale të qytetarëve. Përmes një postimi në rrjetet sociale, Gjema ka shprehur shqetësimin e saj të thellë për gjendjen aktuale në kryeqytet, duke veçuar problemin e korrupsionit dhe mbyten e qytetit nga mbeturinat. Ajo ka përdorur një gjuhë kritike, duke aluduar se kreu i komunës po tenton të shmangë vëmendjen publike nga dështimet në nivel lokal përmes deklaratave të herëpashershme për Qeverinë, median dhe politikën e jashtme. “A e keni vërejtur Përparim Ramën se si flet për Qeverinë, gazetarët, politikën e jashtme e sidomos për çështjet shtetërore? Por vetëm me punët e veta nuk merret! E gjuan gurin sa më lart, që krejt me kqyrë kah qielli, e mos me pa çka po ndodh poshtë, në Prishtinë! Korrupsioni deri në fyt... I mbuluar në bërllok deri në krye, duke kundërmuar... Pret me u marrë tash personat e rëndësishëm me të! Se gjoja unë qëndroj lart, shumë lart!... Populli e ka një thënie për çiftin e tij: ‘Dhia e zgjebosur, e mban bishtin përpjetë!’ P.S. Më falni, por s'po mundem me u duruar... se ma prishi lukthin!”, ka shkruar ndër të tjera Gjema në reagimin e saj.