Zgjedhjet për Senatin në Çeki: Lëvizja ANO e kryeministrit Babiš përballet me vështirësi në raundin e parë

Lëvizja ANO e kryeministrit çek, Andrej Babish, ka hasur në pengesa të konsiderueshme gjatë raundit të parë të zgjedhjeve senatore të mbajtura këtë fundjavë, një proces që shërbeje gjithashtu si një test për peshën e mbështetjes qytetare ndaj ekzekutivit të tij. Votimet u zhvilluan të premten dhe të shtunën, ku elektorati çek vendosi për përfaqësuesit e tyre vendorë dhe për ripërtëritjen e një të tretës së përbërjes së Senatit. Të dhënat zyrtare nga Zyra e Statistikave të Çekisë tregojnë se në këtë betejë elektorale për 27 ulëse senatore garuan gjithsej 154 pretendentë. Vetëm pesë kandidatë arritën të mbyllnin llogaritë që në sfidën e parë, duke përsëritur kështu rekordin e regjistruar në vitin 2024. Megjithatë, asnjë prej tyre nuk i përkiste radhëve të partisë ANO. “Pesë senatorë u zgjodhën në raundin e parë, duke barazuar rekordin historik të vendosur në vitin 2024”, deklaroi Eva Krumpová, zëvendëskryetare e parë e Zyrës së Statistikave të Çekisë. Fati i 22 vendeve të mbetura do të vuloset në balotazh. Në këtë fazë të dytë kanë kaluar 13 kandidatë të ANO-s, të cilët do të maten me 26 përfaqësues të subjekteve dhe koalicioneve opozitare pro-perëndimore, që janë bashkuar në disa zona për të rritur shanset e tyre. Sa i takon zgjedhjeve lokale, siç ishte parashikuar, kandidatët e pavarur dhe strukturat vendase kanë marrë drejtimin e shumicës së komunave në shkallë vendi, ndërsa ANO ka siguruar fitoren në gjashtë kryeqytete rajonale. Andrej Babiš, i cili ka shërbyer si kryeministër edhe në periudhën 2017–2021, u rikthye në krye të qeverisë pasi lëvizja ANO fitoi bindshëm zgjedhjet parlamentare të tetorit 2025. Kjo forcë politike, që vijon të kryesojë bindshëm në sondazhe, krijoi një kabinet nacionalist në bashkëqeverisje me formacionet Motoristët për Veten (AUTO) dhe Liria dhe Demokracia e Drejtpërdrejtë (SPD). Politikani populist dhe themelues i gjigantit të industrisë ushqimore e kimike Agrofert, ka mbajtur një qasje distancuese ndaj ndihmës për Ukrainën që nga marrja e pushtetit. Gjatë fushatës, ANO premtoi fokus te hallet e brendshme, si kostot e energjisë, pensionet dhe strehimi, duke luajtur me kartën e pakënaqësisë qytetare ndaj fondeve të mëdha të drejtuara për Kievin. Megjithatë, kreu i shtetit çek, Petr Pavel, bashkë me partitë e opozitës, mbeten mbështetës të palëkundur të Ukrainës. Në fillim të këtij muaji, Babiš i shpëtoi gjithashtu një mocioni mosbesimi në parlament, i cili lidhej pjesërisht me rritjen e deficitit buxhetor të shtetit.