Nevojitet buxhet prej 100 milionë eurosh: Naim Rashiti bën thirrje për një strategji globale ndaj Gjykatës Speciale

Drejtori i Grupit Ballkanik për Politika, Naim Rashiti, i ka bërë thirrje ekzekutivit kosovar që të ndajë një fond prej 100 milionë eurosh, me qëllim mobilizimin e ekspertizës dhe mekanizmave të specializuar ndërkombëtarë që lidhen me zhvillimet në Dhomat e Specializuara. Gjatë një interviste, ai theksoi se Kosovës i duhet domosdoshmërisht një qasje institucionale që shkon përtej kufijve të ndryshimeve ligjore apo deklaratave të thjeshta politike. Sipas Rashitit, ky angazhim duhet të shoqërohet me përfshirjen e figurave të njohura dhe kredibile të fushës ndërkombëtare, organizimin e tryezave e konferencave, si dhe një dialog të hapur e të drejtpërdrejtë me kryeqytetet perëndimore. “Ky vend duhet t’i ndajë që sot, kjo qeveri, 100 milionë euro për t’i mobilizuar të gjithë mekanizmat e specializuar ndërkombëtarë, për ta luftuar thelbin e çështjes”, ka deklaruar Rashiti, duke shtuar se shifra të tilla modeste si 10 apo 20 milionë euro nuk mjaftojnë për ta mbuluar këtë sfidë. Eksperti i njohur vuri në dukje se ky investim financiar nuk duhet të kufizohet vetëm te mbrojtja juridike e të akuzuarve në Hagë, por duhet të shërbejë për të sfiduar ndërkombëtarisht çdo pretendim për shkelje të konventave nga ana e gjykatës. Ai ngriti shqetësime lidhur me mungesën e llogaridhënies dhe largimin e këtij institucioni nga standardet ndërkombëtare, duke kërkuar që këto kritika të argumentohen profesionalisht. Në kuadër të kësaj strategjie, Rashiti ka propozuar themelimin e një grupi të përbashkët punues, ku të bëjnë pjesë përfaqësues institucionalë e politikë, përfshirë edhe zëra nga spektri i gjerë opozitar. Ai sugjeroi angazhimin e qendrave akademike dhe praktike në Holandë, Angli, Gjenevë dhe Nju-Jork, për të ndërtuar një kauzë të qëndrueshme e të besueshme. “Kjo bëhet me tryeza, konferenca të mëdha ndërkombëtare. Kjo bëhet me lobim, shpjegim të qartë për qeveritë perëndimore”, theksoi ai, duke vlerësuar se mbështetja qytetare duhet të ecë paralel me angazhimin e mirëfilltë institucional. Duke analizuar dinamikat kohore, Rashiti nuk la pa kritikuar reagimin e vonshëm të skenës politike kosovare, duke nënvizuar se përgjegjësia nuk i faturohet vetëm qeverisë aktuale, por shtrihet që nga koha e themelimit të gjykatës. “Absolutisht e vonshme, nga të gjitha palët”, u shpreh ai, ndërsa shtoi se pavarësisht komplekstitetit të ndryshimeve ligjore, Kosova duhet të shfrytëzojë çdo instrument të mundshëm për të konsoliduar qëndrimin e saj përmes burimeve të duhura financiare dhe bashkërendimit politik.