Sfida e madhe në Shkodër, trajneri i Vllaznisë jep sinjalet e para para duelit me Dinamon

Vllaznia po bëhet gati për një nga sfidat më delikate të këtij sezoni në "Abissnet Superiore", ku mbrëmjen e sotme do të presë në stadiumin "Loro Boriçi" skuadrën e Dinamos. Përballja e vlefshme për javën e 6-të pritet të startojë në orën 18:30, ndërsa tensioni dhe pritshmëritë janë në nivele të larta. Në prag të këtij takimi delikat, trajneri i sapoemëruar i kuqebluve, Csaba Laszlo, ka dalë para mediave për të ndarë mendimet e tij rreth gjendjes së skuadrës dhe sfidave që e presin në krye të stolit shkodran. “Çdo ndeshje ka rëndësinë e saj. Patëm disa sfida për të kaluar, por fatmirësisht gjetëm zgjidhje. Vështirësitë janë gjithmonë të pranishme, por thelbësore është që të ketë një rrugëdalje. Ne dhe klubi reaguam në kohë, lojtarët u rikthyen në fushë dhe tani na pret një rival tejet i fortë. Në këtë kampionat çdo kundërshtar paraqet rrezik; nuk jemi ne favoritët, por historia tregon se jo gjithmonë triumfojnë ata që etiketohen si të tillë,” u shpreh fillimisht tekniku i Vllaznisë. Duke folur për aspektin psikologjik dhe ambiciet e tij në krye të skuadrës, Laszlo theksoi se besimi fitohet vetëm përmes rezultateve pozitive në fushën e lojës. “Morali më i mirë ndërtohet kur fiton në fushë. Po përgatitemi maksimalisht për të marrë pikë dhe për të synuar fitoren në çdo ndeshje. E di se është e pamundur t'i fitosh të gjitha, por duhet të nxjerrim maksimumin për t'u ngjitur në renditje. Kur erdha dhe takova presidentin, pata përshtypjen se kisha përballë një njeri të sinqertë që kërkon më të mirën për këtë klub. I thashë po, mora vendimin dhe tani jam këtu për ta çuar punën deri në fund të sezonit. Misioni im kryesor është të siguroj që ky klub të mos rrezikojë rënien nga kategoria, dhe kam besim të plotë se do t'i arrijmë synimet tona,” shtoi ai. Strategu i kuqebluve nuk e fshehu faktin se koha është armiku më i madh për të në këtë fazë tranzicioni, ndërsa vlerësoi lart rëndësinë e çdo pike të mundshme. “Armiku ynë më i madh për momentin është koha. Kur bën ndryshime, duhet që futbollistët të përshtaten sa më shpejt dhe t'i kuptojnë kërkesat e duhura. Çdo pikë vlen shumë për ne. Pavarësisht se ndodhemi në fund të tabelës, për mua si ndeshjet në shtëpi ashtu edhe derbet kanë vetëm një objektiv: fitoren. Në fund të 90 minutave mund të jem i kënaqur edhe me një pikë, por në fushë hyjmë ekskluzivisht për fitore, ndonëse e di se edhe kundërshtari do të mendojë njësoj,” deklaroi Laszlo. Në fund të prononcimit të tij, trajneri bëri me dije se janë ndërmarrë hapa konkretë si në rrafshin taktik ashtu edhe në atë njerëzor, duke theksuar se prioriteti absolut ka qenë stabilizimi i repartit të prapavijës.