Kryeministri Kurti takon ikonën e bardhekaltërve, Xhevdet Muriqi

Kryeministri i vendit, Albin Kurti, ka zhvilluar një takim zyrtar në kabinetin e tij me ish-sulmuesin e njohur të FC Prishtinës, Xhevdet Muriqi, i cili konsiderohet si një ndër figurat kyçe të gjeneratës së artë të këtij klubi gjatë dekadës së tetëdhjetë. Sipas njoftimit zyrtar, kreu i ekzekutivit dhe ish-futbollisti kanë bashkëbiseduar për ndeshjet mbresëlënëse dhe pasionin e atyre viteve, periudhë kur stadiumi i kryeqytetit gumëzhinte nga shikuesit dhe triumfet e skuadrës shndërroheshin në festë mbarëpopullore. Gjatë këtij bashkëbisedimi janë evokuar kujtime për personalitetet e shquara të atij ekipi legjendar, duke përfshirë Fadil Vokrrin, Kujtim Shalën, strategun e njohur Miroslav Qiro Bllazheviq, si dhe vëllain e Xhevdetit, Fadil Muriqi, i cili tash e sa kohë është i vendosur në Australi. Duhet theksuar se Muriqi, pasi ka kaluar gati tri dekada jetë dhe veprimtari në Kroaci dhe njëmbëdhjetë vjet të tjerë në Gjermani, ka vendosur të kthehet përfundimisht në Kosovë gjatë vitit të kaluar. Temë e diskutimit mes tyre kanë qenë edhe zhvillimet aktuale rreth Kombëtares së Kosovës, ecuria e deritanishme në fushën e gjelbër dhe sfidat e radhës që e presin Përfaqësuesen gjatë muajit nëntor.