Hysaj flet pa doreza: Çfarë ndodhi në prapaskenat e Kombëtares dhe biseda në dhomat e zhveshjes

Kapiteni i Kombëtares shqiptare, Elseid Hysaj, ka ndarë detaje interesante rreth sfidës kundër San Marinos, duke zbuluar se kundërshtarët mbetën të habitur nga goli i shënuar ndaj kuqezinjve. Në një rrëfim të sinqertë, ai ka treguar bisedat që ka zhvilluar me bashkëlojtarët e tij menjëherë pas triumfit të vështirë me rezultatin 2-1. "Këto fitore janë të vuajtura sepse futbolli e ka këtë natyrë. Në letër mund të mendosh se është një kundërshtar i lehtë, por në fushën e blertë gjërat ndërlikohen nëse nuk i konkretizon rastet që të krijohen për të shënuar", është shprehur Hysaj duke analizuar ecurinë e ndeshjes. Më tej, mbrojtësi kuqezi ka theksuar rëndësinë e shfrytëzimit të rasteve për të mos rrezikuar deri në sekondat e fundit të sfidës. "Me këto skuadra duhet të shënosh që në fillim dhe ndeshja mund të mbyllet 3 apo 4 me zero. Përndryshe, rrezikon të përfundosh me rezultate të ngushta, si ky 1 me 1 në fund", shtoi ai. Duke u ndalur te atmosfera dhe mesazhi i përcjellë brenda grupit, Hysaj tregoi se ky takim duhet të shërbejë si një kthesë reflektimi për të ardhmen. "I fola djemve brenda dhe u thashë se kjo ndeshje duhet të na mbetet gjatë në kujtesë. Ky duel duhet të shërbejë si një mësim i vyer për ne, pasi nuk ishte një paraqitje e bukur", u shpreh futbollisti. Në përmbyllje të prononcimit të tij, Hysaj ka dhënë një mesazh të qartë rreth qasjes që ekipi duhet të ketë në çdo takim, si dhe për ambiciet e skuadrës në vazhdimësi. "Është një mësim se nuk duhet të nënvlerësojmë asnjë kundërshtar. Duhet të japim 100 për qind nga vetja dhe të realizojë golat. Nëse ne bëjmë maksimumin, jemi të qetë me veten tonë. Deri në momentin që matematika na mban në lojë, ne do të luftojmë dhe do të jemi të gatshëm për të kapur vendin e parë", përfundoi Hysaj.