Gruda: Ursula von der Leyen konfirmoi se Kosova ka të drejtë të ndryshojë ligjin për Gjykatën Speciale

Deputeti i Partisë Demokratike të Kosovës, Përparim Gruda, ka theksuar se miratimi i këtij projektligji nuk duhet të trajtohet si fitore e ndonjë subjekti të caktuar politik, por si fryt i një angazhimi të mirëfilltë institucional. Sipas Grudës, nisma ligjore në fjalë nuk cënon në asnjë mënyrë angazhimet ndërkombëtare të vendit, duke riafirmuar përkushtimin e pandryshueshëm të institucioneve të Kosovës ndaj obligimeve të tyre. “Po ashtu, më lejoni të theksoj se jemi të bindur që ligji tashmë nuk e shkel asnjë detyrim ndërkombëtar që Kosova ka marrë dhe jemi po aq të hapur për autoritetet ndërkombëtare për të thënë që Kosova i rri besnik detyrimeve që ka marrë për të hetuar pretendimet për trafik të organeve dhe Gjykata Speciale nuk do të mbyllet dhe asnjë detyrim ndërkombëtar nuk do të shkëputet. Ne e mirëpresim po ashtu deklaratën e presidentes së Komisionit Evropian, zonjës Von der Leyen, e cila tha që Kosova ka të drejtën e saj të ndryshojë ligjin dhe ky ka qenë një udhërrëfyes për ne për ta draftuar dhe për ta miratuar këtë ligj”, u shpreh Gruda. Gjatë fjalës së tij, deputeti i PDK-së ndau gjithashtu një urim për Justina Shiroka-Pulën lidhur me zgjedhjen e saj në krye të shtetit, duke i dëshiruar fat dhe mbarësi në përmbushjen e përgjegjësive të reja presidenciale.