Skandari në Postën e Durrësit: Pranga bashkëshortit të ish-drejtoreshës, u vinte gjoba mujore punonjëseve

Operacion i ri i forcave të rendit në Durrës lidhur me abuzimet financiare në degën vendase të Postës Shqiptare. Policia ka vënë në pranga Feta Matajn, bashkëshortin e ish-drejtoreshës së këtij institucioni, Elisabeta Mataj, i cili akuzohet se ka ushtruar presion ndaj stafit për përfitime të paligjshme. Feta Mataj, i cili së fundmi mbante detyrën e zv.drejtorit në ndërmarrjen komunale të pastrim-gjelbërimit pranë Bashkisë së Durrësit, u ndalua nga Seksioni për Hetimin e Krimit Ekonomik dhe Financiar. Vendimi erdhi pasi gjatë dëshmive të mbledhura në kuadër të hetimeve, një prej punonjëseve të postës ka pohuar se ai u kërkonte punonjëseve një pagesë të detyrueshme prej 25 mijë lekësh çdo muaj. Ngjarja lidhet me hetimet e mëparshme ndaj ish-drejtoreshës Elisabeta Mataj, e cila dyshohet për zhdukjen e rreth 700 mijë eurove ose 69 milionë lekëve nga fondet e destinuara për qytetarët në degët postare të Shijakut dhe Krujës. Aktualisht, ajo ndodhet në masën e sigurisë “arrest në shtëpi”, pasi më herët ka qenë e ndaluar në paraburgim që prej datës 18 korrik, nën akuzën e vjedhjes në bashkëpunim përmes shpërdorimit të detyrës. Specialistët e Krimeve të Rënda në Drejtorinë Vendore të Policisë Durrës ekzekutuan urdhërin e Gjykatës së Shkallës së Parë të Juridiksionit të Përgjithshëm Durrës, e cila vendosi masën shtrënguese “arrest në burg” për 44-vjeçarin Feta Mataj, banor i lagjes nr. 15 në qytetin bregdetar. Ndaj tij rëndon akuza zyrtare për veprën penale “Shtrëngimi me anë të kanosjes ose dhunës për dhënien e pasurisë, kryer në bashkëpunim”. Dosja e plotë procedurale i ka kaluar Prokurorisë pranë Gjykatës së Shkallës së Parë të Juridiksionit të Përgjithshëm Durrës për ndjekjen e mëtejshme të veprimeve ligjore.