Dejona Mihali lëshon akuza të forta ndaj PDK-së: Ju mashtruan në 2015, po ju gënjejnë edhe sot për Specialen

Koordinatorja e Lëvizjes Vetëvendosje, Dejona Mihali, ka ndërmarrë një sulm të ashpër ndaj Partisë Demokratike të Kosovës dhe protestuesve, duke hedhur poshtë kritikat dhe akuzat e tyre të drejtuara ndaj udhëheqësisë së LVV-së rreth zhvillimeve që lidhen me Gjykatën Speciale. Nëpërmjet një postimi në rrjetet sociale, Mihali u është drejtuar drejtpërdrejt militantëve dhe zyrtarëve të kësaj partie, duke theksuar se presioni i tyre nuk do të ketë kurrfarë ndikimi në vendimet dhe kursin politik të partisë që ajo përfaqëson. “O ju anëtarë të PDK që po sulmoni sot, një pjesë me vepra penale, një pjesë në ndërmarrje publike të Prishtinës, një pjesë drejtorë komunal të Prishtinës, sulmoni sa të doni drejtues të VETËVENDOSJE!s”, ka shkruar ajo në reagimin e saj. Mihali ka shtuar se këto sulme nuk kanë peshë dhe nuk mund të sjellin ndonjë ndryshim në fatin apo dënimet e personave të gjykuar nga Dhomat e Specializuara në Hagë, duke i quajtur ato veprime të kota. “As nuk zgjidhni gjë as nuk ia lehtësoni dikujt dënimin”, ka deklaruar zyrtarja e LVV-së, duke kritikuar gjithashtu mënyrën se si PDK-ja ka vepruar ndaj tyre në periudha të ndryshme kohore. Ajo ka sjellë në vëmendje të kaluarën, duke e krahasuar qasjen e atëhershme me atë të tanishmen: “Dje sulmonit thellësisht me policinë e instrumentalizuar me Rashit Qalat me shokë, sot me duart tuaja. Keq dje, keq sot. Ende nuk u mbushët mend”. Mihali ka ngritur pretendimin se PDK-ja po vë në shënjestër pikërisht ata faktorë që historikisht kanë qenë kundërshtarë të këtij institucioni gjyqësor, përfshirë ish-luftëtarë dhe figura të tjera publike. “Po sulmoni ata që e kanë kundërshtuar Gjykatën Speciale. Ish ushtarë të UÇK-së, ish të burgosur politikë, aktivistë politikë që edhe më shumë se ju e kanë kundërshtuar këtë gjykatë”, ka vijuar ajo. Në vijim të reagimit, ajo ka hedhur akuza të rënda se ky subjekt politik është manipuluar fillimisht në vitin 2015 kur u votua gjykata dhe e njëjta skemë po përsëritet edhe në kohën e sotme. “Nuk po e dini që ju kanë gënjyer në 2015 po ju gënjejnë dhe tash. Prapë ata që i kanë milionat e juve çdo herë veç ju kanë përdorur”, ka thënë Mihali. Ajo ka paralajmëruar gjithashtu se këto fushata politike jo vetëm që nuk u shërbejnë të dënuarve, por përkundrazi, mund të shërbejnë si lëndë e parë në favor të organit të akuzës. “Kështu duke sulmuar kundërshtarët politikë pa asnjë arsye veç sa po ia rëndoni atyre që u dënuan dhe për më keq po ia forconi tezën prokurorisë speciale”, ka përmbyllur ajo. Në fund, koordinatorja e LVV-së ka garantuar se qëndrimet e partisë së saj mbeten të palëkundura dhe se presioni i jashtëm nuk do t'i lëvizë nga bindjet e tyre. “Asnjë veprim i juaji nuk ka efekt te Lëvizja VETËVENDOSJE! Ne bëjmë çka besojmë. E ne nuk i ndërrojmë besimet. Jo dhe tani”, ka përfunduar reagimi i saj.