Kosova kërkon fitoren ndaj Austrisë në “Fadil Vokrri” për të mbajtur gjallë shpresat për Ligën A

Përfaqësuesja e Kosovës luan sot sfidën më vendimtare të këtij cikli në Ligën e Kombeve, ku synon vetëm triumfin për të vazhduar garën drejt elitës së këtij kompeticioni. Dueli mes “Dardanëve” dhe kombëtares së Austrisë do të nisë në orën 18:00 në stadiumin “Fadil Vokrri”, ndërsa tre pikët janë kusht i panegociueshëm për skuadrën e drejtuar nga trajneri Franco Foda. Kombëtarja kosovare vjen në këtë takim pas dy rezultateve jo komode javën e kaluar, ku fillimisht u mposht 3:1 në Vjenë nga austriakët, e më pas u ndal në një barazim pa gola 0:0 kundër Izraelit të enjten. Pas tri përballjeve të para në Grupin G, Kosova renditet në pozicionin e dytë me 4 pikë të arkëtuara, ndërkohë që kreu mbahet nga Austria që numëron 7 pikë. Pavarësisht sfidave, atmosfera në kampin verdhekaltër mbetet optimiste, ku sulmuesi kryesor Vedat Muriqi ka konfirmuar gjatë ditës së djeshme gatishmërinë e tij të plotë për të dhënë maksimumin në fushë.