Ultimatumi i veteranëve të UÇK-së për Kurtin: Afat deri të dielën ose përshkallëzim të hënën para Kuvendit

Organizata e Veteranëve të Luftës së UÇK-së ka ngritur tonet ndaj ekzekutivit, duke paralajmëruar një tubim proteste para Kuvendit të Kosovës për ditën e hënë, më 5 tetor, duke filluar nga ora 12:00. Përfaqësuesit e dala nga lufta i kanë lënë kohë kryeministrit Albin Kurti deri të dielën që të arrihet një pajtim rreth ndryshimeve dhe plotësimeve të Ligjit për Gjykatën Speciale. Ky vendim dhe paralajmërim është bërë i ditur përmes një njoftimi zyrtar në rrjetet sociale, ku kreu i qeverisë bëhet përgjegjës direkt për ngecjen e dialogut dhe dështimin e procesit. "Pas dështimit të arritjes së një marrëveshjeje politike për votimin e menjëhershëm të plotësimit dhe ndryshimit të Ligjit për Gjykatën Speciale, si dhe pas lojës së vazhdueshme politike e procedurale të Albin Kurtit me një çështje kaq të ndjeshme, durimi i veteranëve të UÇK-së dhe i qytetarëve të Kosovës po merr fund," thuhet në reagimin e tyre. Kërkesa e qartë e shoqatës së veteranëve është miratimi i menjëhershëm i këtij projektligji në të dy leximet, ndërkohë që koha e lënë në dispozicion për këtë çështje është tejet e limituar. "Afati për arritjen e një marrëveshjeje politike dhe procedurale që do të mundësonte votimin e menjëhershëm të të dy leximeve të plotësimeve dhe ndryshimeve të Ligjit për Gjykatën Speciale, për veteranët e UÇK-së është vetëm deri nesër, e diel." Nëse nuk arrihet ndonjë konsensus brenda këtij afati, organizata ka bërë të qartë se protestat nuk do të jenë hapi i vetëm, por do të pasojnë hapa të tjerë radikalë. "Nëse deri nesër nuk ka dakordim, nga e hëna veteranët e UÇK-së do t’i përshkallëzojnë veprimet e tyre." Pakënaqësitë ndaj kryeministrit Kurti janë shprehur në formën më të ashpër, duke e akuzuar atë se po luan me kauza të ndjeshme kombëtare për interesat e tij politike të radhës. "Kategoritë e dala nga lufta e UÇK-së janë thellësisht të indinjuara me qasjen e z.Kurt, i cili po bënë kalkulime politike edhe me dhimbjen, sakrificën dhe dinjitetin e qytetarëve të Kosovës." Sipas kësaj organizate, aktualisht po ndodh një zvarritje e pajustifikueshme e një teme që prek ndjeshëm fatin e shumë familjeve në vend. "Ky pushtet, në vend që të dëgjojë zërin e qytetarëve dhe ta adresojë qartë këtë çështje, po vazhdon të shtyjë, të kalkulojë dhe të abuzojë politikisht me një çështje që prek drejtpërdrejt mijëra familje dhe njerëz që bartin plagët e luftës." Në fund të njoftimit, shoqata e veteranëve u bën thirrje publike të gjithë qytetarëve që t'i bashkohen protestës masive para ndërtesës legjislative. "Të hënën, në ora 12:00, ju ftojmë të gjithëve para Kuvendit të Kosovës."