Kushti i Haxhiut për rikthimin e Bekim Sejdiut në garën presidenciale

Ushtruesja e detyrës së presidentes, Albulena Haxhiu, ka bërë të ditur se Bekim Sejdiu mund të rikthehet sërish në garë për kreun e shtetit të Kosovës, nëse gjashtë deputetët e Lidhjes Demokratike të Kosovës (LDK), të cilët nuk e kanë mbështetur më parë, japin garanci se do të jenë të pranishëm në sallën e Kuvendit gjatë seancës së votimit. Sipas Haxhiut, Sejdiu ishte tërhequr nga ky proces pikërisht për shkak të mungesës së mbështetjes nga ky grup ligjvënësish, megjithëse ajo ka theksuar se akordi mes Lëvizjes Vetëvendosje dhe LDK-së lidhur me këtë kandidaturë mbetet në fuqi dhe nuk është prishur. “Sa i përket kandidatit për president, ai është zoti Bekim Sejdiu. Ai është tërhequr prej garës sepse nuk e ka pasur mbështetjen e 6 prej deputetëve të LDK-së nuk e kanë mbështetur. Ne nuk jemi tërhequr nga marrëveshja. Unë jam e bindur që në qoftë se do të ketë, si me thënë, deklarim që do të qëndrojnë në sallë, atëherë jam e bindur që zoti Sejdiu do të rikthehet. Ai është tërhequr për shkak se nuk i ka pasur votat”, ka deklaruar ajo. Duke e vlerësuar lart integritetin moral dhe profesional të kandidatit, Haxhiu u shpreh e bindur se një figurë e tillë përputhet plotësisht me kërkesat e këtij posti institucional, për sa kohë që sigurohet kuorumi i nevojshëm prej dy të tretave në parlament. “Unë mendoj që në qoftë se ka garanci që janë 2/3-at në Kuvend, mendoj që do të rikthehet. Unë kam vlerësuar që ai ka pranuar që të jetë kandidat i përbashkët i Vetëvendosjes dhe i LDK-së dhe çmoj integritetin e lartë profesional dhe moral që zoti Sejdiu ka shërbyer me dinjitet kudo që ka qenë, prandaj edhe kam konsideruar që një figurë e tillë është pikërisht për këtë pozicion të presidentit”, shtoi ajo. Në lidhje me përpjekjet për zhbllokimin e ngërçit politik, Haxhiu bëri të ditur se bisedimet udhëhiqen nga kryeministri në detyrë dhe kryetari i Lëvizjes Vetëvendosje, Albin Kurti. Ajo lëshoi një thirrje publike për përgjegjësi dhe maturi nga i gjithë spektrimi politik, duke paralajmëruar se shkuarja në zgjedhje të parakohshme, veçanërisht në këtë periudhë pas vendimit të Hagës, do të përbënte një gabim të rëndë. “Megjithatë, çështjen e negociatave e drejton Kryeministri Kurti, kryetari i Vetëvendosjes, dhe pikërisht nga ato takime mund të dalin çështje të cilat janë të rëndësishme për të ecur para dhe për të mos e çuar vendin në zgjedhje të parakohshme. Më besoni që gabimi më i madh që do të mund ta bënim tani për tani, sidomos pas vendimit të Hagës, do të ishte që ta çonim vendin në zgjedhje të parakohshme, prandaj unë ftoj partitë politike për qasje serioze dhe konstruktivitet në këtë drejtim”, përfundoi Haxhiu.