Sfida ndaj Finlandës, Maran kërkon përqendrim maksimal: Janë një kundërshtar shumë i komplikuar

Në daljen e përditshme para mediave në vigjilje të përballjes me Finlandën, trajneri i Kombëtares shqiptare, Rolando Maran, ka analizuar dallimet taktike mes këtij kundërshtari dhe Bjellorusisë, duke u ndalur gjithashtu te zgjedhjet në krahun e majtë dhe situata e grumbullimit të Kerjotës. Duke bërë një krahasim mes dy rivalëve, tekniku kuqezi u shpreh se bëhet fjalë për dy skuadra me skema të ndryshme, por që shquhen për organizimin e tyre në fushën e lojës. Sipas tij, finlandezët janë një ekip tejet i vështirë që synon t'i heqë ritmin kundërshtarit, duke u mbrojtur ngushtë dhe duke e bërë lojën të vështirë. Lidhur me situatën në krahun e majtë dhe përdorimin e Pilos dhe Mitajt, Maran theksoi se çdo futbollist duhet t'i vërë cilësitë e tij në shërbim të grupit. Ai kërkoi impenjim maksimal nga të gjithë, duke shtuar se për të qenë konkurrues, skuadra duhet të japi më shumë se 100% të mundësive të saj, ndërsa shprehu fatin e mirë që ka në dispozicion lojtarë të përkushtuar. Tekniku shtoi se këta lojtarë kanë veçori të ndryshme dhe mund të alternohen me njëri-tjetrin në fushë, duke u përshtatur sipas nevojave të skuadrës, pasi nuk plotësohen domosdoshmërisht duke luajtur së bashku në të njëjtën kohë. Sa i përket pranisë së Kerjotës, Maran sqaroi se ftesa për të erdhi si domosdoshmëri për të plotësuar grupin për shkak të numrit të lartë të ndeshjeve dhe dëshirës për ta njohur më mirë nga afër. Ai pranoi se deri tani nuk ka pasur mundësi apo momentin e duhur për ta hedhur në fushë, por lojtari mbetet pjesë e grupit për procesin e përshtatjes, ndërsa mbetet për t'u parë nëse do të ketë hapësira aktivizimi, ashtu siç ishte parashikuar në planin e tij.