Haxhiu kundërshton kushtëzimet: Zgjedhja e presidentit është prioritet absolut, jo çështje për pazare politike

Ushtruesja e detyrës së presidentes, Albulena Haxhiu, ka theksuar se konsensusi për zgjedhjen e kreut të ri të shtetit duhet të jetë fokusi kryesor i partive politike, duke hedhur poshtë çdo përpjekje për ta lidhur këtë proces me votimin e ndryshimeve ligjore të propozuara nga Partia Demokratike e Kosovës për Dhomat e Specializuara. Gjatë një deklarimi mbi zhvillimet aktuale politike, ajo u shpreh kundër çdo forme të të ashtuquajturave “pazare” për postin e presidentit. Haxhiu bëri thirrje që faktori politik të ulet në tryezë me përgjegjësi të lartë institucionale për të diskutuar prioritetet e vendit, duke vënë theksin te rëndësia e madhe e plotësimit të këtij vakumi kushtetues. “Unë kam përcjellë disa prej qëndrimeve të Partisë Demokratike të Kosovës, natyrisht që nuk janë gjithmonë të njëjta, ndërrojnë nga dita në ditë, nga përfaqësuesi në përfaqësues. Pra nuk ka një konsistencë në qëndrimet e tyre. Sa i përket deklaratës së zotit Hamza, meqë është kryetari i partisë po e marr si të mirëqenë, unë nuk jam që të bëhem pazare për këtë çështje. Unë mendoj që të gjithë me përgjegjësinë më të lartë që kemi duhet të ulemi dhe t'i flasim për prioritetet që i kemi, sepse për mua më e rëndësishme është që ta zgjedhim presidentin sesa që ta votojmë ligjin,” u shpreh ajo, duke iu referuar nismës së PDK-së. Sipas saj, çështja e projektligjit për ndryshimet në ligjin për Dhomat e Specializuara, si dhe kërkesa e Kuvendit për krijimin e një strategjie të përbashkët institucionale, mund të trajtohet plotësisht vetëm pasi të jetë zgjedhur presidenti i vendit. “Pse po e them këtë? Sepse në qoftë se zgjidhet presidenti, atëherë do të kemi mundësi ta trajtojmë projektligjin, do të kemi mundësi që ta adresojmë kërkesën e Kuvendit të Republikës së Kosovës për një strategji të përbashkët. Dhe për bindjen time më e qëlluar është strategjia e përbashkët ku mblidhen përfaqësuesit e institucioneve, ekspertë të fushës, ekipet mbrojtëse dhe përgatitemi e jemi në shërbim të ekipeve mbrojtëse në procesin e ankimimit në Gjykatën e Apelit, sesa të procedojmë nisma që ata vetë e dinë që mund të mos çojnë kërkund,” shtoi Haxhiu. Në fund, ajo paralajmëroi se dërgimi i vendit në zgjedhje të reja do të ishte i padrejtë dhe do ta sillte sërish të njëjtin problem në tryezë, duke bërë thirrje që ky ngërç të zgjidhet tani. “Prandaj prioritet mbi prioritetet është që ta kemi presidentin, sepse edhe vetë Hashim Thaçi, Kadri Veseli, Rexhep Selimi, Jakup Krasniqi nuk mendoj që do të ndiheshin se e kanë mbështetjen e shtetit në qoftë se ne me vetëdije të plotë e çojmë vendin në zgjedhje. Dhe sidomos, ju e dini shumë mirë që edhe pas zgjedhjeve situata nuk do të ndryshojë dhe sërish problemin e njëjtë do ta kemi në tavolinë. Atëherë pse jo tash? Pse duhet për të dytën herë na çojë çështja e presidentit në zgjedhje?” përfundoi ajo.