Tragjedi në rrugën Tapizë–Fushë-Krujë: Humb jetën i riu 22-vjeçar, plagoset drejtuesi 18-vjeçar

Një aksident i rëndë rrugor me pasoja fatale ka tronditur pasditen e sotme aksin Tapizë–Fushë-Krujë, konkretisht në zonën e njohur si “Arrameras”, ku një person ka ndërruar jetë dhe një tjetër ka pësuar lëndime. Sipas informacioneve paraprake të autoriteteve policore, ngjarja e rëndë ka regjistruar rreth orës 16:50, kur dy automjete janë përplasur fort mes tyre. Në krye të mjeteve ndodheshin shtetasi K. C., 44 vjeç, dhe shtetasi M. S., 18 vjeç. Për shkak të dhunës së goditjes, pasagjeri që ndodhej në makinën e të riut 18-vjeçar, i identifikuar si shtetasi egjiptian E. A., rreth 22 vjeç, ka gjetur vdekjen e menjëhershme në vendngjarje. Ndërkaq, vetë drejtuesi i mjetit, 18-vjeçari M. S., ka pësuar dëmtime trupore dhe është dërguar me urgjencë drejt spitalit. Sipas burimeve mjekësore, ai ndodhet nën vëzhgimin e bluzave të bardha dhe jashtë rrezikut për jetën. Forcat e rendit dhe grupi hetimor kanë zbarkuar pa humbur kohë në vendin e ngjarjes, duke nisur hetimet dhe veprimet e nevojshme procedurale me qëllim zbardhjen e plotë të shkaqeve dhe dinamikës së këtij aksidenti tragjik.