Netanyahu: Sulmuesi i avionit në fluturimin Dubai-Tel Aviv u ndikua nga radikalizmi islamist

Kryeministri i Izraelit, Benjamin Netanyahu, ka bërë të ditur se të dhënat e deritanishme hetimore tregojnë se personi që sulmoi me thikë bashkë-pilotin dhe tentoi të merrte drejtimin e një aeroplani në linjën Dubai-Tel Aviv, ka qenë subjekt i një “indoktrinimi radikal islamist”. Ngjarja ndodhi të mërkurën, kur mjeti fluturues i kompanisë “Flydubai” pësoi një rënie të papritur lartësie prej më shumë se 5.200 metrash, vetëm dy orë pas shkëputjes nga pista. Falë ndërhyrjes së shpejtë të ekuipazhit dhe pasagjerëve, sulmuesi u neutralizua, duke mundësuar një ulje pa rrezik. Gjatë një interviste për mediat ndërkombëtare, kreu i qeverisë izraelite theksoi se ekziston një mundësi e lartë që agresori – i identifikuar si shtetas i Omanit – të ketë pasur qëllim fatal për rrëzimin e mjetit ajror. Në anën tjetër, autoritetet zyrtare në Emiratet e Bashkuara Arabe kanë bërë të ditur se kanë hapurt një hetim të gjithëanshëm për të zbardhur nëse ngjarja ka prapavijë terroriste. Bashkë-piloti i plagosur po i nënshtrohet pyetjeve nga autoritetet në Arabinë Saudite, vend ku u realizua ulja e jashtëzakonshme. Megjithatë, zyrtarët e Emirateve insistojnë se kompetenca juridike për ngjarjen u takon atyre, pasi avioni mban regjistrimin dhe flamurin e këtij shteti. Sipas kryeministrit izraelit, pasi u vu nën kontroll nga udhëtarët dhe stafi, agresori ka përsëritur thirrjet “më vrisni, më vrisni”, duke konfirmuar qartë prirjet e tij vetëvrasëse. Duke lidhur bashkë elementët e kaluar të radikalizmit të tij, përmasat e sulmit dhe sjelljen e tij në bord, Netanyahu vlerësoi se këto detaje përbëjnë pista shumë të rëndësishme hetimore, megjithëse shtoi se ende nuk janë nxjerrë konkluzione përfundimtare.