Tragjedi në Pezë: 16-vjeçari merr makinën e fshehur të babait, humb jetën në aksident, plagoset shoku i tij

Një ngjarje e rëndë ka tronditur zonën e Pezës mbrëmjen e së martës, ku një adoleshent ka ndërruar jetë dhe një tjetër ka mbetur i plagosur si pasojë e një aksidenti rrugor. Sipas informacioneve paraprake, dyshohet se 16-vjeçari kishte marrë automjetin e të atit pa leje dhe pa dijeninë e tij. Gjatë lëvizjes, i mituri ka humbur kontrollin e mjetit, i cili ka dalë nga rruga dhe ka përfunduar i përmbysur në një kanal. Goditja ka qenë fatale për drejtuesin e ri, i cili nuk ka mundur t'u mbijetojë plagëve. Ndërkohë, shoku i tij që udhëtonte po ashtu në makinë është dërguar me urgjencë në spital për të marrë trajtimin e nevojshëm mjekësor dhe aktualisht fatmirësisht ndodhet jashtë rrezikut për jetën. Grupi hetimor ndodhet në terren dhe po punon intensivisht për të zbardhur plotësisht shkaqet dhe dinamikën e këtij incidenti tragjik. “Tiranë. Më datë 29.09.2026, rreth orës 22:10, në Pezë-Helmes, shtetasi i mitur 15 vjeç, duke drejtuar pa leje një automjet, ka humbur kontrollin mbi drejtimin e tij dhe për pasojë automjeti është përplasur me skarpatën anësore të rrugës, dhe më pas është përmbysur. Si pasojë e aksidentit, drejtuesi i mjetit ka humbur jetën, ndërsa pasagjeri, 16 vjeç, është dëmtuar dhe ndodhet nën kujdesin e mjekëve, jashtë rrezikut për jetën. Vijon puna për dokumentimin dhe sqarimin e plotë të rrethanave të rastit”, njoftoi zyrtarisht policia.