Nis turi ballkanik: Ursula von der Leyen sot viziton Tiranën, nesër zbarkon në Prishtinë

Presidentja e Komisionit Evropian, Ursula von der Leyen, nis sot udhëtimin e saj zyrtar nëpër Ballkanin Perëndimor, duke zgjedhur Tiranën si stacionin e parë të kësaj vizite të rëndësishme diplomatike. Ky tur diplomatik, i cili fillon në Shqipëri, do të vijojë më pas në Kosovë, Mal të Zi dhe do të përmbyllet në Maqedoninë e Veriut. Gjatë qëndrimit në kryeqytetin shqiptar, zyrtarja e lartë e Bashkimit Evropian do të zhvillojë takime me krerët më të lartë të shtetit. Diskutimet do të përqendrohen kryesisht te rrugëtimi i Shqipërisë drejt familjes evropiane dhe hapat konkretë që duhen ndërmarrë për anëtarësimin e plotë. Agjenda e Von der Leyen do të vijojë më 1 tetor në Prishtinë, ku ajo do të pritet në takime të veçanta nga ushtruesja e detyrës së Presidentes, Albulena Haxhiu, si dhe nga kryeministri Albin Kurti. Po në të njëjtën ditë, shefja e KE-së do të udhëtojë drejt Podgoricës, ndërsa vizitën në rajon do ta përmbyllë më 2 tetor me ndalesën e fundit në Shkup. Boshti qendror i këtij turi në katër shtetet e Ballkanit Perëndimor do të jetë ecuria e reformave të brendshme, progresi në procesin e integrimit evropian, si dhe integrimi gradual i tregjeve rajonale në strukturat e përbashkëta të BE-së. Një vëmendje e veçantë do t'i kushtohet Planit të Rritjes për Ballkanin Perëndimor. Ky projekt strategjik i bllokut evropian synon të nxisë zhvillimin ekonomik, të mbështesë reformat jetike dhe t'i përafrojë ekonomitë e rajonit me tregun unik evropian. Ky shënon udhëtimin e gjashtë zyrtar të Ursula von der Leyen në rajonin tonë. Përveç takimeve politike, presidentja e KE-së pritet të inspektojë edhe disa nga projektet kyçe që po realizohen me mbështetjen financiare të Bashkimit Evropian.