Goditje për Kosovën: Albian Hajdari largohet i lënduar nga grumbullimi, reagon me një mesazh prekës

Mbrojtësi i qendrës së përfaqësueses së Kosovës, Albian Hajdari, ka ndarë një mesazh mjaft emocionues pasi u detyrua të braktisë kampin stërvitor të dardanëve si pasojë e një dëmtimi fizik. Përmes një reagimi në rrjetin e tij social Instagram, futbollisti ka shprehur keqardhjen e madhe që nuk do të ketë mundësi të zbresë në fushë për sfidat e radhës të Kosovës. Hajdari ka bërë të ditur se do të udhëtojë menjëherë drejt Gjermanisë, ku do të nisë procesin e rikuperimit mjekësor. “Sot më dhemb jo vetëm lëndimi, por edhe mendimi se nuk do të jem në fushë me Kosovën në ndeshjet e ardhshme. Për fat të keq, duhet të kthehem në Gjermani për t’u rikuperuar. Lëndimi fizik është një dhimbje më vete, por të mungosh kur e di se ekipi po lufton për Kosovën… kjo dhemb edhe më shumë. Do të doja të isha aty, bashkë me ju, duke luftuar për çdo top, për çdo minutë dhe për këtë fanellë që për mua do të thotë gjithçka”, shkroi ai. Pavarësisht kësaj pengese, lojtari ka theksuar se mbështetja e tij për bashkëlojtarët do të jetë e pakursyer dhe se ndihet jashtëzakonisht krenar me rrugëtimin e deritanishëm të përfaqësueses. “Megjithatë, jam dhe do të jem gjithmonë krenar për këtë ekip dhe për gjithçka që kemi arritur deri tani. Kemi treguar karakter, kemi luftuar së bashku dhe kemi bërë që Kosova të jetë aty ku meriton të jetë. Unë do të jem me ju nga larg. Kosova mbi të gjitha. Shihemi së shpejti”, ka përfunduar mbrojtësi dardan.