Ronaldinho bën thirrje për Endrick: Talenti brazilian gati për aventurën e re në Serie A

Legjenda e futbollit brazilian, Ronaldinho, ka ndarë mendimet e tij rreth së ardhmes së talentit Endrick, duke sugjeruar se Italia mund të jetë stacioni i tij i radhës. Në një rrëfim të gjerë për mediat italiane, fituesi i Topit të Artë vlerësoi lart aftësitë e bashkatdhetarit të tij, i cili po përflitet për një kalim të mundshëm te Milani ose Roma gjatë afatit kalimtar të janarit. “Endrick ka dëshmuar vlerat e tij në kampionate të ndryshme, nga Brazili në Francë e Spanjë. Pavarësisht moshës së re, ai ka potencialin për të lënë gjurmë të pashlyeshme. Për mendimin tim, ai do të përshtatej në mënyrë ideale në Serie A, qoftë te Milani apo Roma. Cilësitë e tij teknike i mundësojnë të bëjë diferencën në çdo skuadër të botës”, u shpreh ish-ylli i Barcelonës. Aktualisht 20-vjeçar, Endrick po kalon një periudhë sfiduese te Real Madridi, ku deri më tani ka grumbulluar vetëm shtatë paraqitje në të gjitha kompeticionet. Megjithatë, ai ka arritur të lërë shenjë, duke shënuar pikërisht ndaj Romës, ekip që tashmë ka shfaqur interesim për shërbimet e tij. Në daljet e tij të fundit për mediat, sulmuesi nuk ka mohuar mundësinë e një largimi nga “Santiago Bernabeu” në janar për të kërkuar më shumë hapësira. Duke marrë parasysh rrethanat aktuale dhe këshillën e idhullit të tij, transferimi në futbollin italian mbetet opsioni më i përfolur për të ardhmen e afërt të brazilianit.