Duka reagon pas suksesit të dyfishtë të Kombëtareve të moshave U17 dhe U19

Kombëtaret e moshave të Shqipërisë, U17 dhe U19, kanë arritur fitore të rëndësishme në kualifikueset për Europianin, sipas moshave përkatëse. Kombëtarja shqiptare U-17 ka marrë një fitore të rëndësishme 3:1 ndaj Skocisë, në ndeshjen e dytë të raundit të parë të kualifikueseve të Kampionatit Europian U-17, UEFA EURO 2027. Kuqezinjtë e drejtuar nga trajneri Armand Dama përmbysën disavantazhin fillestar dhe siguruan tri pikë me shumë vlerë në Grupin 4. Kombëtarja shqiptare U-19 e ka mbyllur me sukses të plotë raundin e dytë të kualifikueseve të Kampionatit Europian 2026/27. Kuqezinjtë triumfuan me rezultatin 4-0 ndaj Armenisë në ndeshjen e dytë dhe të fundit të këtij raundi, duke regjistruar të njëjtin rezultat si në sfidën e parë ndaj Qipros. Menjëherë pas këtij suksesi, ka ardhur edhe reagimi i Presidentit të FSHF-së, Armand Duka, përmes një postimi në rrjetet e tij sociale. “Urime Kombëtareve U-19 dhe U-17 për rezultatet e arritura! Një sukses i jashtëzakonshëm për Shqipërinë U-19, që me dy fitore bindëse 4-0 ndaj Qipros dhe Armenisë siguroi vendin e parë në grup dhe ngjitjen në Ligën A për raundin e tretë të kualifikueseve. Urime edhe Kombëtares U-17 për fitoren e merituar 3-1 ndaj Skocisë, pas një përmbysjeje fantastike. Një rezultat që e mban Shqipërinë në garë për vendin e parë në grup. Përgëzime futbollistëve, trajnerëve dhe gjithë stafit për punën, përkushtimin dhe këto emocione që po i dhuroni futbollit shqiptar. Vazhdoni kështu”,shkruan Duka.