Tensione dhe tym i dendur në Bulevard: Përdorimi i gazit lotsjellës nga policia ngre dyshime serioze

Zona përreth Ministrisë së Brendshme është përfshirë nga një situatë e tensionuar dhe pamje të rënduara, pas ndërhyrjes së forcave të rendit gjatë protestës. Sipas pamjeve filmike nga vendngjarja, agjentët e policisë kanë hedhur sasi të konsiderueshme gazi lotsjellës për të shpërndarë turmën e qytetarëve, edhe në momentet kur protestuesit kishin nisur të tërhiqeshin nga zona. Në fokus të vëmendjes kanë rënë edhe kapsulat e përdorura, të cilat janë konstatuar të shpërndara nëpër trotuare. Ajo çfarë ka rënë në sy nga pamjet është mungesa e dukshme e datës së skadencës së shënuar në këto mjete policore. Ky detaj ka ngritur pikëpyetje të shumta në lidhje me standardet dhe afatin e përdorimit të municioneve të përdorura, pavarësisht se ekspertiza e mëtejshme mbetet e nevojshme për të vërtetuar nëse kapsulat ishin apo jo jashtë afatit të vlefshmërisë.