Bayerni triumfon në udhëtim ndaj Mainzit, por dëmtohet kapiteni Manuel Neuer

Bayern Munichu ka vazhduar ecurinë e tij pa humbje në Bundesliga, pasi ka shënuar fitore me rezultat 2:1 në transfertë kundër Mainz 05, në kuadër të javës së nëntë të kampionatit gjerman. Pas këtij suksesi, kampioni në fuqi i Gjermanisë ruan serinë e rezultateve pozitive pas nëntë xhirove të parë, duke regjistruar gjashtë fitore dhe tri barazime. Bavarezët e nisën ndeshjen me intensitet të lartë dhe zhbllokuan rezultatin në minutën e 14-të. Pasi mbrojtja vendase bëri një gabim trashanik, Harry Kane përfitoi nga rasti dhe pasoi për Joshua Kimmich, i cili me një gjuajtje të saktë nga rreth 17 metra realizoi për 0:1. Megjithatë, festa e mysafirëve u zbeh në minutën e 42-të për shkak të një dëmtimi. Portieri dhe kapiteni Manuel Neuer ndjeu shqetësime fizike në këmbën e djathtë dhe u detyrua të braktiste fushën e blertë, ndërsa vendin e tij e zuri Jonas Urbig. Me fillimin e pjesës së dytë, saktësisht në minutën e 57-të, Bayerni arriti të dyfishojë epërsinë. Laimer krosoi një top në zonë për Harry Kane, i cili e ruajti zotërimin e topit pas ndërhyrjes së Gruber dhe më pas asistoi te talenti Karl, i cili nuk gaboi nga afërsia për t'i dhënë skuadrës avantazhin e dyfishtë prej 0:2. Mainzi nuk u dorëzua dhe bëri përpjekje deri në fund, duke arritur të ngushtonte epërsinë në minutën e 90+3. Phillip Tietz përfitoi nga një harkim brenda zonës dhe me një goditje të saktë me kokë e dërgoi topin afër shtyllës së majtë, duke vendosur shifrat në 1:2. Megjithatë, koha e mbetur ishte e pamjaftueshme për vendasit, dhe gjiganti bavarez siguroi tri pikët e plota nga ky udhëtim. Pas kësaj xhiroje, Bayern Munich mban kreun e renditjes tabelore me 21 pikë të grumbulluara, ndërsa Mainz 05 pozicionet në vendin e 11-të me 10 pikë.