Kurti flet për “kthimin e trurit”: Gjatë vitit 2025 në Kosovë u rikthyen 171 mjekë

Kryeministri i Kosovës, Albin Kurti, ka trajtuar çështjen e largimit dhe rikthimit të profesionistëve shëndetësorë në vend, duke shfaqur optimizëm gjatë fjalës së tij. Gjatë fjalimit inaugurues në edicionin e katërt të “Swiss Medical School”, kreu i ekzekutivit vuri theksin te ndryshimi i qasjes dhe frenimi i tendencave të kaluara. “Të gjithë jemi të brengosur me atë që quhet në mënyrë të popullarizuar, por me dhembje, ‘ikje e trurit’, edhe mjekët edhe infermierët tanë që lëshojnë atdheun dhe punojnë në vende të ndryshme të botës, posaçërisht në Evropën Perëndimore. Por viteve të fundit e kemi dukurinë e cila është e kundërta e saj, drejtimi i njëjtë, por kahja e kundërt, ‘kthimi i trurit’”, u shpreh ai. Në vijim të fjalës së tij, Kurti bëri të publike shifrat konkrete, duke bërë të ditur se vetëm përgjatë vitit 2025, gjithsej 171 mjekë kanë vendosur të kthehen në atdhe për të ushtruar profesionin e tyre dhe për të kontribuar në sistemin shëndetësor të vendit.