Tahiri ‘vë në mur’ pushtetin për rastin Dehari: Keni gjashtë vjet që nuk keni bërë asgjë

Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka kërkuar zbardhjen e plotë të vdekjes së aktivistit të Lëvizjes Vetëvendosje, Astrit Dehari, në 10-vjetorin e kësaj ngjarjeje tragjike. Megjithatë, përtej thirrjes për drejtësi, Tahiri ka kërkuar llogaridhënie të drejtpërdrejtë nga partia në pushtet, duke i akuzuar ata për pasivitet të pajustifikueshëm. Gjatë fjalës së tij në seancën plenare të Kuvendit, Tahiri adresoi kritika të ashpra ndaj shumicës parlamentare. Sipas tij, Lëvizja Vetëvendosje, pavarësisht se ka gjashtë vjet në pushtet, nuk ka arritur të sigurojë as provat më elementare për të ndriçuar rrethanat e vdekjes së Deharit. “Lëreni këtë qasje, mos e politizoni rastin, por kërkoni përgjegjësi nga ata që mbajnë pushtetin prej gjashtë vitesh dhe nuk kanë ndërmarrë asnjë veprim konkret. Ne kërkojmë drejtësi njësoj si ju, por kërkojmë edhe përgjegjësi e llogaridhënie”, deklaroi Tahiri para deputetëve. Në të njëjtën seancë, deputeti i AAK-së komentoi edhe Raportin e progresit për Kosovën, të cilin e vlerësoi si dokumentin më kritik dhe më negativ që është hartuar ndonjëherë për vendin tonë.