Reagimi i ashpër i Altin Krasniqit në Kuvend: Vendimi i Speciales synon të kriminalizojë luftën e UÇK-së

Deputeti i Partisë Demokratike të Kosovës (PDK), Altin Krasniqi, njëherësh djali i ish-kryetarit të Kuvendit dhe ish-zëdhënësit të Ushtrisë Çlirimtare të Kosovës, Jakup Krasniqi, e ka cilësuar nga foltorja e Kuvendit vendimin e Gjykatës Speciale ndaj ish-krerëve të UÇK-së si një padrejtësi madhore me pasoja të rënda për shtetin e Kosovës. Gjatë fjalës së tij, e cila përkoi me gjashtëvjetorin e arrestimit dhe dërgimit në Hagë të ish-drejtuesve të UÇK-së, Krasniqi theksoi se vendimet ndaj Jakup Krasniqit, Hashim Thaçit, Kadri Veselit dhe Rexhep Selimit nuk bazohen në përgjegjësi të dokumentuara individuale, por janë ndëshkime për shkak të funksioneve shtetërore e politike që ata kanë mbajtur në të kaluarën. "Më 16 shtator 2026, nuk u dënuan Jakup Krasniqi, Hashim Thaçi, Kadri Veseli dhe Rexhep Selimi për veprimet e tyre apo për përgjegjësitë e tyre individuale. U dënuan për shkak të posteve politike që ata kishin bartur", u shpreh ligjvënësi i PDK-së. Krasniqi ka ngritur gjithashtu shqetësimin rreth mënyrës se si është trajtuar Drejtoria Politike e UÇK-së gjatë gjithë këtij procesi gjyqësor, duke aluduar se vendimi ka për qëllim kryesor njollosjen e idealit dhe pastërtisë së luftës çlirimtare. "Kjo ka vetëm një arsye: duan t’i përlyejnë dhe baltosin objektivat e UÇK-së, objektivat e kësaj drejtorie politike, të cilat ishin të njëjta ndër breza: liria dhe pavarësia e Kosovës", shtoi ai. Në fjalën e tij, deputeti ka tërhequr vëmendjen se ky aktgjykim rrezikon të shfrytëzohet nga shtetet që nuk e njohin shtetësinë e Kosovës, duke nisur fushata të reja diplomatike për ta paraqitur këtë vendim si një damkë mbi të gjithë luftën e popullit për liri. "Imagjinoni ofensivën diplomatike që do të zhvillojnë vendet kundërshtare të pavarësisë sonë, të cilat nuk janë të pakta. E këto vende nuk do të flasin për dënime individuale, por do të flasin për dënimin dhe kriminalizimin e një lufte çlirimtare, siç ishte ajo e UÇK-së", paralajmëroi ai. Në fund, duke evokuar dëshmitë e dhëna përgjatë gjyqit, Krasniqi përmendi se figura nga fusha të ndryshme, përfshirë diplomatë ndërkombëtarë dhe familjarë të viktimave, kishin dëshmuar në favor të pafajësisë së ish-krerëve të UÇK-së.