Skandal në Prishtinë: Punonjësi i 'Raiffeisen' abuzon me detyrën, zbulon të dhënat bankare të Përparim Ramës

Një shkelje e rëndë e privatësisë ka ndodhur në bankën “Raiffeisen”, ku një punonjës ka hyrë në mënyrë të paautorizuar në llogarinë bankare të kryetarit të Prishtinës, Përparim Rama, duke bërë publike gjendjen financiare dhe transaksionet e tij personale. Ky rast është konfirmuar zyrtarisht nga Zyra për Media e Komunës së Prishtinës. Sipas njoftimit të komunës, pasi kryetari Rama ka adresuar ankesën e tij drejt institucionit bankar, banka ka ndërmarrë masa disiplinore duke e larguar nga puna punonjësin e identifikuar si përgjegjës për këtë ndërhyrje të paligjshme. “Kryetarit Rama i është konfirmuar se një punonjës i Raiffeisen Bank është qasur pa autorizim në llogarinë bankare të tij dhe ka shpërndarë të dhëna personale nga llogaria e tij. Për këtë shkelje të rëndë, kryetari Rama ka dorëzuar ankesë zyrtare dhe ka kërkuar sqarime nga banka”, thuhet në reagimin e komunës. Kryetari i kryeqytetit nuk do të ndalet me kaq. Ai ka paralajmëruar se do të ndjekë rrugët ligjore si ndaj bankës, ashtu edhe ndaj individit që kreu këtë shkelje. Përmes padive përkatëse, Rama synon të kërkojë përgjegjësi penale për cenimin e konfidencialitetit bankar, duke iu referuar neneve 199 dhe 200 të Kodit Penal të Republikës së Kosovës. Po ashtu, ai do të kërkojë kompensim për dëmin e shkaktuar ndaj privatësisë dhe reputacionit të tij publik. Aktualisht, mbetet e paqartë nëse ky incident ka ndonjë lidhje me hetimet që po zhvillohen nga Prokuroria Speciale e Kosovës ndaj kryetarit Rama. Ndërkohë, banka “Raiffeisen” nuk ka kthyer ende një përgjigje zyrtare lidhur me këtë rast, ndonëse është kontaktuar për sqarime që nga pasditja e së mërkurës. Vlen të theksohet se Ligji Nr. 08/L-304, konkretisht neni 142, pika 5.7, përcakton qartë se qasja në informacione konfidenciale lejohet ekskluzivisht gjatë procedurave penale ose parapenale, vetëm kur një gjë e tillë urdhërohet me shkrim nga gjykata kompetente ose organet e ndjekjes.