Incident në 'Doku Tech': Aktivistet feministe nxirren nga salla teksa kërkonin ballafaqim me Kurtin

Një grup aktivistesh nga Kolektivi për Mendim dhe Veprim Feminist është detyruar të lërë ambientet e Sallës së Kuqe në Pallatin e Rinisë, ku po zhvillohej edicioni i 13-të i konferencës 'Doku Tech'. Në këtë ngjarje ishte i pranishëm kryeministri i Kosovës, Albin Kurti, me të cilin aktivistet kishin shprehur synimin për të zhvilluar një bisedë. Megjithatë, tentativat e tyre për një ballafaqim u ndërprenë nga sigurimi i kryeministrit dhe stafi organizator, të cilët kërkuan largimin e tyre të menjëhershëm nga salla. Prania e aktivisteve në këtë konferencë erdhi pas një aksioni simbolik që ato kishin organizuar më herët para objektit të Këshillit Prokurorial të Kosovës. Kjo nismë është pjesë e një serie protestash që po mbahen prej ditësh, përmes të cilave kërkohet drejtësi për Arlinda Zekajn, si dhe për të gjitha gratë që kanë humbur jetën si pasojë e dhunës në Kosovë.