Një dekadë pa drejtësi për Astrit Deharin: Kurti kërkon zbardhjen e vrasjes që tronditi vendin

Në përvjetorin e dhjetë të ndarjes nga jeta të aktivistit të Lëvizjes Vetëvendosje, Astrit Dehari, familjarë, qytetarë dhe përfaqësues të lartë shtetërorë janë mbledhur pranë varrit të tij për të nderuar kujtimin e tij. Edhe pas një dekade, vdekja e Deharit mbetet një plagë e hapur për shoqërinë kosovare, pasi rrethanat e plota të ngjarjes vazhdojnë të mbeten të paqarta. Kryeministri i Kosovës, Albin Kurti, gjatë fjalimit të tij përkujtimor ka adresuar kritika të ashpra ndaj sistemit të drejtësisë, duke shprehur zhgënjimin e tij për mungesën e epilogut ligjor. Sipas tij, fakti që edhe pas dhjetë vitesh identiteti i autorëve të kësaj ngjarjeje tragjike mbetet i panjohur, dëshmon për një dështim institucional. “10 vjet më vonë ne nuk e dimë emrin e vrasësit të Astritit”, ka deklaruar Kurti, duke rikujtuar datën fatale të 5 nëntorit 2016, kur Dehari humbi jetën në Qendrën e Paraburgimit në Prizren. Kryeministri theksoi se mënyra se si është trajtuar ky rast ndër vite ka lënë shumë pikëpyetje të hapura. Kurti ka vënë në pah zvarritjet procedurale, duke përmendur faktin se deri më tani janë ndërruar pesë prokurorë në këtë rast. Po ashtu, ai kritikoi ashpër institucionet e sigurisë dhe drejtësisë të asaj kohe, të cilat, sipas tij, nxituan me konstatime të pabazuara që në orët e para pas vdekjes së aktivistit. “Pesë prokurorë janë ndërruar përgjatë rastit dhe qysh në orët e para pas mbytjes së tij, institucionet përgjegjëse u patën nxituar të japin konstatime para se të kryheshin hetimet. Kjo qasje e rëndoi situatën, e cila vazhdon të mbetet e tillë edhe sot, përderisa askush nuk është akuzuar, arrestuar apo dënuar për mbytjen e Astritit”, përfundoi kryeministri Kurti.