Raporti i KE-së për Maqedoninë e Veriut: Kushtetuta pengesë për integrimin, kritika të ashpra për korrupsionin

Ambasadori i Bashkimit Evropian në vend, Michalis Rokas, do t'ia dorëzojë sot zyrtarisht kryeministrit Hristijan Mickoski Raportin e Progresit të Komisionit Evropian për vitin 2026. Pas pranimit të dokumentit në ndërtesën e Qeverisë, është parashikuar që të dy zyrtarët t'u drejtohen mediave në një konferencë të përbashkët për shtyp. Në vlerësimin e saj vjetor, Brukseli konfirmon se Maqedonia e Veriut ka shënuar hapa përpara në zbatimin e Agjendës së Reformave, megjithatë, miratimi i ndryshimeve kushtetuese mbetet kushti i panegociueshëm për të avancuar në rrugën drejt anëtarësimit në BE. Komisionerja për Zgjerim, Marta Kos, ka nënvizuar se qëllimi i Komisionit mbetet hapja e grupit të parë të negociatave sapo të plotësohen detyrimet, duke shtuar se topi tashmë është në fushën e Shkupit. Raporti vë në dukje mungesën e vullnetit politik për të përmbushur obligimet e dala nga konkluzionet e Këshillit të 18 korrikut 2022, që parashikojnë përfshirjen e bullgarëve dhe pjesëtarëve të kombeve të tjera në Kushtetutë. Përveç kësaj, KE-ja shpreh shqetësim për gjendjen në gjyqësor, ku pavarësia vazhdon të cenohet nga ndërhyrjet politike dhe mungesa e resurseve të mjaftueshme, ndonëse është vënë re një progres modest në reforma. Situata në luftën kundër korrupsionit vlerësohet si alarmante, pasi nuk është regjistruar asnjë përparim konkret. Komisioni kritikon ashpër ndryshimet në Kodin Penal të janarit 2026, duke theksuar se ato nuk kanë arritur t'i zhbëjnë pasojat negative të ndërhyrjeve ligjore të vitit 2023. Polarizimi i thellë politik po ashtu po shërben si frenues për miratimin e ligjeve kyçe, duke lënë shumë kapituj negociues në vendnumëro. Në raport përmenden edhe problemet me lirinë e shprehjes, presionet ndaj gazetarëve dhe sfidat e vazhdueshme me autonominë financiare të shërbimit publik dhe organit rregullator të mediave. Sa i përket politikës së jashtme, BE-ja kërkon përmirësim të dialogut me Bullgarinë dhe zbatim rigoroz të marrëveshjeve dypalëshe. Gjithashtu, theksohet se mosrespektimi i emrit kushtetues nga zyrtarët e lartë qeveritarë rrezikon të dëmtojë marrëdhëniet me Greqinë.