Ndahet nga jeta ish-luftëtari i UÇK-së, deputeti Osman Musliu bën homazh prekës për Lutfi Berishën

Ish-pjesëtari i Ushtrisë Çlirimtare të Kosovës, Lutfi Berisha, ka ndërruar jetë ditën e djeshme, duke lënë pas një dhimbje të madhe për familjen, miqtë dhe bashkëluftëtarët e tij. Deputeti nga Drenasi, Osman Musliu, ka ndarë dhimbjen e tij përmes një mesazhi prekës, ku e ka përshkruar Berishën si një njeri të ndershëm, një luftëtar të palodhur të lirisë dhe një mik të shtrenjtë. “U nda nga ne një burrë i ndershëm, luftëtar i lirisë dhe shok i dashur, Lutfi Berisha”, ka shkruar Musliu në kujtim të tij. Parlamentari ka sjellë në vëmendje edhe prejardhjen e të ndjerit, të cilin miqtë e njohnin me nofkën “Luta”. Ai ishte i biri i vetëm i haxhi Milazimit, një personaliteti të njohur dhe shumë të respektuar në rajonin e Drenicës, i cili gjithashtu iu bashkua radhëve të UÇK-së për të kontribuar në çlirimin e vendit. “Humori i tij i këndshëm e muhabetet e gjata do t’i mungojnë odës e mbi të gjitha të gjithë shokëve”, ka shtuar më tej deputeti Musliu, duke evokuar kujtimet e përbashkëta. Në fund të dedikimit të tij, Musliu i ka përcjellë ngushëllimet më të sinqerta familjarëve dhe ka lutur Krijuesin që t'ia shpërblejë veprat dhe kontributin e dhënë për lirinë e Kosovës. “E lusim Zotin që ta ketë shpërblyer për kontributin e madh për liri e ishallah na bashkon me të në xhenet!”, ka përfunduar shkrimin e tij Musliu.