Pranga kreut të njësisë elitare serbe: Arrestohet Igor Zhmiriq për dhunë ndaj studentëve

Autoritetet kanë arrestuar të martën komandantin e Njësisë Speciale Antiterroriste të Serbisë (SAJ), Igor Zhmiriq. Së bashku me të, në pranga kanë përfunduar edhe katër pjesëtarë të tjerë, aktualë dhe të mëparshëm, të këtij formacioni policor. Sipas të dhënave, aksioni ndërlidhet me keqtrajtimin dhe dhunën e ushtruar ndaj studentëve gjatë manifestimeve antiqeveritare që tronditën Serbinë për muaj me radhë. Njësia elitare SAJ ishte angazhuar drejtpërdrejt në terren gjatë këtyre protestave massive. Ndalimi i drejtuesit të SAJ-së vjen menjëherë pas disfatës zgjedhore të Aleksandër Vuçiqit dhe në prag të krijimit të qeverisë së re në Beograd, duke shënuar një nga sinjalet e para konkrete të llogaridhënies për mekanizmat e sigurisë që operuan nën pushtetin e tij. Ky zhvillim ka rëndësi të posaçme edhe për Kosovën. Ngjarja vjen në një kohë kur raporti i fundit i Komisionit Evropian, i publikuar të mërkurën, nënvizon se Serbia ende nuk ka ndërmarrë hapa substancialë për të siguruar llogaridhënie lidhur me sulmin e armatosur në Banjskë të kryer më 24 shtator 2023.