Nga sektori i teknologjisë në diplomaci: Vëllai i ish-kandidates së VV-së emërohet në Ambasadën e Kosovës në Katar

Hashim Sahiti, vëllai i ish-kandidates së Lëvizjes Vetëvendosje për Asamblenë Komunale në Mitrovicë, Samire Sahiti, është emëruar në një pozitë të rëndësishme diplomatike. Ai do të shërbejë si Sekretar i Dytë në Ambasadën e Republikës së Kosovës në Doha të Katarit. Vendimi për këtë emërim, i cili mban datën 15 maj 2026, është nënshkruar nga Zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca. Mandati i Sahitit në këtë detyrë diplomatike është paraparë të zgjasë katër vjet, ndërsa fillimi i ushtrimit të përgjegjësive të tij në kryeqytetin e Katarit është caktuar për datën 3 gusht 2026. Karriera e Hashim Sahitit brenda Ministrisë së Punëve të Jashtme dhe Diasporës ka shënuar zhvillime të shpejta. Ai u punësua fillimisht në vitin 2022 si zyrtar i teknologjisë informative (IT). Vetëm një vit më pas, në gusht të vitit 2023, Sahiti avancoi në pozitën e Administratorit të Lartë të Sistemeve, pas një procesi të brendshëm ku ai ishte kandidati i vetëm që plotësonte kriteret e kërkuara për lëvizje brenda kategorisë. Ky emërim pason një valë të raportimeve lidhur me pozicionimet e fundit në shërbimin e jashtëm të Kosovës. Së fundmi, vëmendja është përqendruar te disa emërime të tjera, siç është rasti i Njazi Ajvazit, ish-anëtar i Kryesisë së Listës Guxo në Mitrovicë, i cili është caktuar Sekretar i Dytë në Konsullatën e Kosovës në Kopenhagë. Po ashtu, në listën e emërimeve të fundit figurojnë edhe Rina Dragidella, mbesa e Ministrit të Punëve të Brendshme, Xhelal Sveçla, e cila është emëruar Sekretare e Dytë në Uashington, si dhe Fitore Dalipi, vajza e axhës së ish-shefit të kabinetit të kryeministrit, Luan Dalipit, e cila ka marrë pozitën e Sekretares së Dytë në Berlin. Ndërkohë, Vera Rexhepi Leci, bashkëshortja e një bashkëpunëtori të afërt të Luan Dalipit, është emëruar konsulle në Iowa të Shteteve të Bashkuara të Amerikës.